WAHESHIMIWA MADIWANI WATEMBELEA HALMASHAURI YA JIJI LA DAR ES SALAAM

Posted on: January 29th, 2025

Wataalam kutoka Halmashauri ya Jiji la Dar es Salaam leo Januari 30, 2025, wametoa elimu kwa Waheshimiwa Madiwani, Mbunge na Wakuu wa Idara na Vitengo wa Halmashauri ya Manispaa ya Singida kuhusu masuala mbalimbali ya maendeleo katika ziara ya mafunzo iliyofanyika katika Jiji hilo.

Ziara hiyo ilikuwa na lengo la kujifunza mbinu na mifumo mbalimbali ya kimaendeleo inayotekelezwa katika jiji hilo, ambayo itaweza kuboresha hali ya upatikanaji wa mapato ndani ya Manispaa ya Singida.

Katika ziara hiyo, Waheshimiwa Madiwani wamepata elimu kuhusu namna ya ukusanyaji wa mapato, huku lengo kuu likiwa ni kuboresha usimamizi wa mapato na matumizi ndani ya Halmashauri ya Singida.

Sambamba na hilo wamejifunza pia kuhusu usafi wa mazingira na utunzaji wa taka ndani ya Jiji la Dar es Salaam, masuala ambayo ni muhimu katika kuimarisha mazingira ya kiuchumi na kijamii.

Wataalam hao pia walielezwa umuhimu wa kushirikiana na taasisi binafsi katika utekelezaji wa miradi ya Maendeleo kupitia mifumo ya ushirikiano wa umma na sekta binafsi (PPP), ambao umeonyesha mafanikio makubwa katika miradi mbalimbali ya kimaendeleo jijini humo.

Ziara hii imeongozwa na Mstahiki Meya wa Manispaa ya Singida, Mhe. Yagi Kiaratu, ambaye alisema kuwa lengo la ziara hiyo ni kuchukua uzoefu na mbinu zinazotekelezwa katika Jiji la Dar es Salaam ili ziwawezeshe kuboresha huduma na maendeleo ya Manispaa ya Singida.