WAHUSISHENI MADIWANI KATIKA HATUA ZOTE ZA UTEKELEZAJI WA MIRADI YA MAENDELEO - MEYA MANISPAA YA SINGIDA

Posted on: May 11th, 2023

Mstahiki Meya wa Manispaa ya Singida Yagi Kiaratu, ametoa rai kwa wataalamu ngazi zote kuhakikisha wanawahusisha madiwani katika ngazi zote za utekelezaji wa miradi ya maendeleo.

Mheshimiwa Kiaratu ametoa rai hiyo wakati akihitimisha Mkutano wa Baraza la Madiwani robo ya tatu baada ya kujadili utekelezaji mzima wa miradi ya Maendeleo.

Amesema Halmashauri ya Manispaa ya Singida imepokea fedha kwa ajili ya uboreshaji wa miundo mbinu ya shule za msingi kupitia mradi wa BOOST zaidi ya Shs. Bilioni 1 na  pia kupitia serikali kuu zaidi ya Shs. Milioni 350 kwa ajili ya shule kongwe, hivyo kushauri  shule zote zilizopokea fedha kuhakikisha zinawashirikisha kikamilifu na katika hatua zote madiwani wa kata husika pamoja na wenyeviti wa mitaa na vijiji.

Amesema Diwani akishirikishwa vyema ataweza kusimamia vizuri kamati za ujenzi zilizoundwa ili kuhakikisha kila kitu linatekelezwa kwa uwazi na kwa ukamilifu na kuufanya mradi kuwa shirikishi na hivyo kukamilika kwa wakati.

Naye Kaimu Mkurugenzi wa Manispaa ya Singida Jeshi Lupembe, amewataka wananchi katika kata zote kushiriki katika kuibua mradi kulingana na uhitaji wa huduma husika kama shule katika mitaa, vijiji na vitongoji.

Amesema uibuaji huo ambao ni shirikishi jamii uende sambamba na utekelezaji ambapo serikali itaunga mkono ili miradi iliyolengwa iweze kukamilika ikiwa ni pamoja na kuhakikisha inaingizwa katika mpango na bajeti lakini pia kuiombea miradi hiyo fedha kutoka serikali kuu.

Jeshi alitumia fursa hiyo pia kuelezwa mafanikio yaliyopatikana katika Nyanja ya elimu na utawala bora yaliyoiwezesha halmashauri ya Manispaa ya Singida kupata tuzo za ushindi katika mitihani ya darasa la nne, darasa la saba, utawala bora na ugatuaji madaraka .

Kwa upande wake Mwenyekiti wa Chama cha Mapinduzi, Bi. Lucia Mwiru, ameupongeza Uongozi wa Manispaa ya Singida kwa tuzo zilizpatikana na kusema hayo ni matunda ya ushirikiano sio tu baina ya Mkurugenzi na watendaji wengine lakini pia baina ya timu ya menejimenti na waheshimiwa madiwani.

Ametoa rai kwa wakuu wa idara na vitengo kutobweteka kwa tuzo hizo na badala yake kuongeza bidii ili kuleta ufanisi zaidi kupitia umoja na msikamano ulijengeka ili kutekeleza vyema ilani ya Chama Tawala  CCM.