WAJASIRIAMALI SINGIDA WATAKIWA KUHAMISHIA BIASHARA KWENYE SOKO JIPYA LA UNYANKINDI

Posted on: September 20th, 2023

Manispaa ya Singida kwa kushirikiana wa wadau wake, wamewekeza miundo mbinu mbalimbali yenye thamani zaidi ya Sh.Milioni 900/=, katika soko la Unyankindi, ili kumaliza tatizo la uzalishaji wa taka, unaofanywa na wajasiriamali kwenye maeneo yasiyo rasmi na salama.

Kukamilika kwa miundombinu hiyo, itawalazimu wajasiriamali wa matunda na mbogamboga, waliopo soko la Msufini na wale wanaopanga bidhaa barabarani, sasa kuhamishia biashara zao kwenye soko jipya la Unyankindi.

Mwishoni mwa wiki iliyopita, mkuu wa mkoa wa Singida, Peter Serukamba, alitoa maelekezo kwa manispaa hiyo, kuhakikisha inasimamia usafi wa mji, sambamba na Baraza la Madiwani kutunga sheria ndogo, ili kudhibiti uchafu.

Akizungumzia hali ya soko ilivyo, Mwenyekiti wa ujenzi soko la Unyankindi, Ramadhan Isango, amefurahishwa kukamilika kwa miundombinu, ila ameomba Manispaa kushinikiza wajasiriamali wote kuhamia kwenye soko hilo, badala ya kuendelea kupanga bidhaa zao barabarani, hali inayohatarisha afya za walaji.

Ujenzi wa soko hili ulianza rasmi mwaka 2020 na kukamilika 2021, kwa agizo la serikali ya awamu ya sita, ilipoagiza wajasiriamali nchini watafutiwe maeneo rasmi…ni soko zuri lenye mahitaji yote, ikilinganishwa na kule wanakopanga bidhaa zao barabarani na kwenye makazi ya watu,”anasema Isango.

Mkuu wa idara ya viwanda, biashara na uwekezaji Manispaa ya Singida, Erick Sinkwembe, amesema jumla ya vibanda 300 na kituo cha magari kwa ajili ya kushushia mizigo, tayari ujenzi wake umekamilika katika soko la Unyankindi, hivyo ameawataka wajasiriamli kuhamia sokoni hapo kupunguza msongamano na taka, eneo la katikati ya mji.

Sinkwembe amesema kuendelea kupanga bidhaa zao eneo la Msufini, pembezoni mwa barabara na katika nyumba za watu, inahatarisha Maisha yao, hivyo akatoa rai waende kwenye maeneo rasmi yaliyotengwa, ikiwemo soko la Unyankindi, Mahembe, usafirishaji Majengo, stendi ya vumbi Misuna na Ukombozi.

“Wafanyabishara watakapohamia kwenye maeneo hayo, itahamasisha soko kukua, maa yake soko ni watu, hata wateja wanapoenda pale, sehemu hiyo itakua na hata taasisi zinazotoa mikopo ni rahisi kukopesha, kutokana na mjasiriamali kuwa na kituo rasmi cha kazi yake,” alisema Sinkwembe.

Kaimu Mkuu wa kitengo cha usafi na udhibiti wa taka, Manispaa ya Singida, Shuku Kaishwa, amesema uzalishaji taka hivi sasa ni tani 120 kwa siku, huku kiwango cha uzoaji kikiwa ni asilimia 60 hadi 75 kwa siku, hivyo iwapo wajasiriamali hao watatekeleza agizo la kwenda kwenye maeneo rasmi, itasaidia kuuweka mji katika hali ya usafi.

Kaishwa amesema, kwa mujibu wa sheria ya afya na usafi ya manispaa 2019, ipo wazi, ikimtaka kila mfanyabiashara kulipia ushuru wa ada ya taka, lakini kwa wajasiriamali hao kutokuwa kwenye maeneo rasmi, wanakuwa ni sehemu kuu ya uchafuzi wa mazingira, kutokana na kuwemo sehemu ambazo siyo rasmi.

“Wafanyabiashara hawa, wao wakati mwingine kutokana na kutokuwa maeneo rasmi, utakuta wanafanya shughuli zao kwa muda ambao saa za kazi kwa watumishi wa serikali umeisha, hivyo hata kudai ushuru wa ada ya taka, inakuwa vigumu kukusanya, lakini wakiwa maeneo rasmi, ni rahisi kufuatilia na kupata ada hiyo,”anasisitiza Kaishwa.

Naye Meneja wa Wakala wa Barabara mijini na vijijini, wilaya ya Singida, mhandisi, Lambert Bayona, amesema sheria ya barabara ya mwaka 2007, inazuia na inadhibiti mtu au kikundi chochote bila ya kuwa na kibali cha mamlaka husika kufanya chochote, hivyo wafanyabiashara hao kuweka bidhaa zao barabarani, ni kosa kisheria na wanapaswa kuondolewa, ili kutii matakwa ya sheria.

Amesema wafanyabiashara wa eneo la Msufini, wanatakiwa kuiacha wazi barabara, kwa ajili ya matumizi husika ikiwemo wananchi kwenda kupata huduma muhimu katika sehemu hiyo, yenye huduma nyingi za kijamii, ikiwemo zahanati, ofisi za chama (CCM), shughuli za ibada na masuala mengineyo ya kijamii.

 Kutokana na hali hiyo, mhandisi Bayona, ameiomba manispaa ya Singida, kusimamia zoezi hilo, kwa kuwaondoa wote wanaoendesha biashara kwenye barabara, ili wapishe na waende walikotengewa na serikali, kwa ajili ya shughuli zinazoendana na shughuli zao.