WAJUMBE WA KAMATI YA SIASA YA WILAYA YAFURAHISHWA NA UKAMILISHAJI WA ZAHANATI KWA VIWANGO VYENYE UBORA

Posted on: December 11th, 2023

Wajumbe wa kamati ya siasa ya Wilaya ya Singida Mjini wameeleza kufurahishwa na kutoa pongezi kwa Mkurugenzi wa Manispaa kutokana na kazi nzuri ya ukamilishaji wa miradi ya zahanati 03  za Ititi, Unyianga na Kisasida katika Manispaa ya Singida.Wajumbe hao wametoa pongezi hizo leo Desemba 11, 2023 baada ya kufanya ziara ya kutembelea miradi mbalimbali kujionea hali halisi ya utekelezaji na hatua mbalimbali iliyofikia.Mwenyekiti wa Chama cha Mapinduzi Wilaya ya Singida Mjini , Bi. Lucia Mwiru amesema miradi hiyo ya afya imetekelezwa kwa kiwango chenye ubora ambao wananchi wanapaswa kujivunia na kutoa wito kwa wajumbe wa kamati za siasa ngazi ya kata kuwatangazia wananchi kufika katika vituo hivyo ili kupata huduma bora za afya kwani tayari vina watumishi wenye sifa.Miradi iliyotembelewa na kamati hiyo ya siasa ya Wilaya ni pamoja na Mradi wa ujenzi wa shule ya sekondari Utemini, Shamba darasa la wafugaji kata ya Mtipa, mradi wa umeme wa REA katika Kijiji cha Mandewa, ukamilishaji wa zahanati ya Ititi na ujenzi wa barabara  ya Mwenge  kwa kiwango cha lami unaendelea kutekelezwa.Mwenyekiti Mwiru pamoja na wajumbe wa kamati ya Siasa wamempongeza mwekezaji mwenyeji Hassan Tati anayemiliki shamba la mifugo Taish Farm ambaye ameweza kutoa mafunzo kwa wafugaji  zaidi ya  65 katika Manispaa ya Singida juu ya mbinu bora za ufugaji, unenepeshaji  wa mifugo na malisho bora ya mifugo. Kampuni ya Tayish imeweza pia kuajiri zaidi ya watumishi 30 wakiwemo wanawake na wanaume.“ Mwekezaji Tati anastahili pongezi kwa kazi nzuri ya kutoa elimu ya ufugaji na malisho bora ya mifugo kwa wafugaji na wakulima ni moja ya malengo ya ilani ya uchaguzi kuhamasisha uwekezaji lakini pia kuwajengea uwezo wananchi kiuchumi”

Wajumbe hao wametoa rai kwa wananchi kuhakikisha wanatumia vyema fursa ya uwepo wa mashamba darasa ili kupata ujuzi  katika kilimo na ufugaji ili kuweza kuzalisha mazao kwa wingi lakini pia kufanya ufugaji wenye tija.

Aidha wametoa pongezi kwa Rais wa Jamhuri ya Muungano wa Tanzania, Dkt. Samia Suluhu Hassan kwa kuwajali wananchi na kuhakikisha wanapata huduma ya umeme maeneo yote ya vijijini kwa maana ya kata za pembezoni kwa upande wa Manispaa ya Singida.