WAKULIMA SINGIDA WAHIMIZWA KUTUMIA MBOLEA NA MBEGU BORA KUONGEZA UZALISHAJI

Posted on: November 3rd, 2023

Serikali mkoani Singida imewataka wakulima kutumia mbegu Bora na mbolea, Ili kuwa na matokeo makubwa katika mavuno.

Mkuu wa mkoa wa Singida Peter Serukamba ametoa Agizo hilo leo Novemba 3, 2023 wakati akizindua ghala la mbolea ya ruzuku aina ya FOMI inayozakishwa na kusambazwa na kampuni ya Intracom.

Amesema lengo la kutumia mbegu Bora na mbolea ni Ili kumwezesha mkulima kuvuna mazao Kwa kiwango kikubwa na hivyo kuondokana na umasikini pamoja na kuwa na uhakika wa chakula Kwa kipindi chote Cha mwaka.

Amesema, msimu wa kilimo uliopita (2022/2023)wakulima wa mkoa wa Singida waliweza kuzalisha asilimia 50 ya alizeti iliyozalishwa nchini kote, na hivyo kuwataka wakulima hao kutumia mbolea ya FOMI kupandia, kukuzia na kunenepesha mazao Ili kupata mazao ya kutosha na kufikia asilimia 100 hivyo kuondokana na umasikini.

Aidha, Serukamba amepongeza jitihada za Mhe. Rais wa Jamhuri ya Muungano wa Tanzania, Dkt. Samia Suluhu Hassan, Kwa kuwajali wakulima Kwa kuongeza bajeti ya kilimo kutoka Bilioni 200 msimu uliopita na kufikia zaidi ya Bilioni 900 msimu wa kilimo 2023/2024, ambazo zimeelekezwa katika kilimo Cha umwagiliaji, mbolea ya ruzuku, na utafiti wa mbegu Bora.

Naye Naibu Meya wa Manispaa ya Singida, Geoffrey Mama ameishukuru kampuni ya Intracom Kwa kuleta mbolea hiyo, na kuwaomba kusogeza mbolea hiyo karibu na wakulima katika Manispaa ya Singida Kwa kutumia ghala lililoko katika Kata ya Mtamaa, Ili kurahisisha upatikanaji.