WALENGWA WA TASAF WAPEWA ELIMU KUHUSU KUJIANDIKISHA KATIKA ORODHA YA WAPIGAKURA SERIKALI ZA MITAA

Posted on: October 14th, 2024

Katika kuhakikisha wananchi wanapata huduma bora kama inavyoelekeza Serikali ya Awamu ya Sita chini ya Rais Dkt. Samia Suluhu Hassan, Mkurugenzi wa Manispaa ya Singida, Bi. Joanfaith Kataraia, amekutana na walengwa wa Mfuko wa Maendeleo ya Jamii (TASAF) ili kusikiliza kero zao na kutoa elimu kuhusu uandikishaji katika orodha ya Wapigakura wa Serikali za Mitaa.

Usikilizwaji wa kero hizo ulifanyika katika Shule ya Msingi Ukombozi, ambapo Bi. Kataraia alikagua maendeleo ya mradi wa kuweka vigae (pavement) ambao umekamilika na tayari umekabidhiwa kwa shule.

Walengwa hao walitoa kero zao kwa Mkurugenzi huyo aliambatana na Mratibu wa TASAF pamoja na Wataalamu wengine wa Manispaa ya Singida na lengo ni kuona wananchi wanapata huduma bora na kero zao kutatuliwa.

Akizungumza na walengwa hao, Bi. Kataraia alisisitiza umuhimu wa uandikishaji kwa ajili ya uchaguzi wa Serikali za Mitaa, akieleza kuwa viongozi bora wanapaswa kuchaguliwa ili kuweza kusaidia maendeleo ya jamii.

Walengwa wa TASAF walisisitizwa umuhimu wa kujiandikisha na kuwashauri ndugu zao kufanya hivyo. Lakini pia walielimishwa juu ya tofauti kati ya uandikishaji wa Serikali za Mitaa na uandikishaji wa kadi ya mpiga kura, ambayo itatumika katika uchaguzi wa Rais, wabunge, na madiwani mwakani.

Zoezi la uandikishaji katika orodha ya Wapigakura wa Serikali za Mitaa linatarajiwa kumalizika Oktoba 20, 2024, huku uchaguzi ukitarajiwa kufanyika Novemba 27, mwaka huu.

Wananchi wote wametakiwa kuchangamkia fursa hii ili waweze kushiriki katika uchaguzi huo muhimu.