WALENGWA WASIMULIA NAMNA TASAF ILIVYOBADILISHA MAISHA WAISHUKURU SERIKALI

Posted on: August 17th, 2024

Walengwa wa Mradi wa TASAF wameeleza jinsi mradi wa vitofali (pavement) ulivyobadilisha maisha yao na kutoa shukrani kwa Serikali ya Awamu ya Sita kwa ushirikiano na msaada wao.

Akizungumza wakati wa kukabidhi mradi wa vitofali uliohitimishwa katika Shule ya Msingi Imbele, Manispaa ya Singida, walengwa walisisitiza umuhimu wa mradi huo. Mradi huo, uliofadhiliwa na TASAF, umeendeshwa na walengwa 44, ambapo mwanaume alikuwa mmoja pekee. Walengwa walihusika katika ufyatuaji wa vitofali na kutengeneza eneo la utawala la shule hiyo ili kupunguza vumbi na tope wakati wa masika.

Mradi huu umekuwa na mchango mkubwa kwa walengwa, ambao wamepata elimu ya ufundi ya ufyatuaji vitofali na wanaamini ujuzi huu utaendelea kuwa na manufaa kwao. Caroline Francis, mmoja wa walengwa, anasema: “Mradi wa TASAF umenisaidia kubadili maisha yangu. Hadi sasa nimeweza kujenga nyumba na pia nafanya biashara ndogondogo. Nashukuru Serikali yetu kwa kuendelea kutuunga mkono.”

Mwinyi Masumbuko, mwanaume pekee kati ya walengwa 44, ameongeza: “Nimepita katika miradi mingi ya TASAF, lakini huu umeweza kumsaidia mtoto wangu kumaliza kidato cha nne na pia nimemudu kupata kiwanja. Ingawa fedha ni chache, tunapambana na tunashukuru Serikali.”

Mratibu wa TASAF wa Manispaa ya Singida, Stara Beka, amesema: “Huu ni mradi mpya wa TASAF na umeleta mabadiliko makubwa. Walengwa wamepata ujuzi utakaowasaidia sana. Wengi tayari wapo tayari kuanzisha vikundi vitakavyokuwa msaada kwao. Tunashukuru Serikali ya Jamhuri ya Muungano wa Tanzania chini ya Dkt. Samia Suluhu Hassan kwa kuendelea kutoa ruzuku kwa walengwa hawa.”

Mwalimu Mkuu wa Shule ya Imbele, Edina Daudi, amesema: “Kama familia ya Imbele, tumenufaika sana na mradi huu. Tulikuwa tunakumbana na tatizo la vumbi na mmomonyoko wa udongo, lakini mradi huu umeleta mabadiliko makubwa. Tunamshukuru Dkt. Samia Suluhu Hassan na timu nzima ya TASAF kwa kubadili maisha ya walengwa.”