WALIMU MANISPAA YA SINGIDA WAPEWA MAELEKEZO

Posted on: April 9th, 2024

AFISA wa Elimu wa Mkoa wa Singida, Dkt Elipidius Baganda ametoa maagizo kwa walimu wa Mkoa wa Singida kufundisha kwa malengo na kuwa wafuatiliaji ilikuweza kuongeza ufaulu kwa wanafunzi.

Dkt Baganda amesema hayo, katika Kikao kazi cha Tathmini ya Mitihani ya Taifa ya Darasa la Saba, Kidato cha Nne, Kidato ch Sita na Upimaji wa Darasa la Nne na Kidato cha Pili, kilichofanyika jana, katika Ukumbi wa Maktaba ya Sekondari, Mwenge.

Katika kikao hicho, Dkt Baganda aliweza kutoa maelekezo kwa walimu na lengo lake kuu kuhakikisha Mkoa wa Singida unakuwa na ufaulu bora kwa mwaka huu, kuanzia ngazi ya chini kabisa.

“Kwanza nataka kuona mkifanya kazi kwa malengo na ufuatiliaji, malengo ni yale ambayo nilisema la nne kufaulu wote la saba asilimia 85, kidato cha pili wafaulu wote cha nne ufaulu kuanzia asilimia 50 na kidato cha sita wafaulu kwa asilimia 100.

 “Lakini suala la nidhamu kwa walimu na wanafunzi lizingatiwe. Wanafunzi wapatiwe mazoezi ya kutosha na ya sahihishwe na maswali yanayotungwa yazingatie viwango.

 “Walimu msimamie uandikishaji na udahili wa wanafunzi na hii ni kwa mwakani kwa wale ambao wataanza darasa la awali na la kwanza pamoja na kuhakikisha kidato cha kwanza wanaripoti shule walimu kama kuna mwanafunzi hajaripoti au hata andikishwa kutoka kwenye kata yako usikubali kukaa kimya chukua hatua.

 “Lakini kama walimu tusimamie vyema ujenzi kwa kujenga majengo bora, majengo ya kamilike kwa wakati na thamani ya fedha ionekana katika majengo hayo. Na suala la utoro shuleni lisiwepo.

 “Pia washaurini(Mthibiti ubora wa shule) Halmashauri kuhakikisha mnasoma maelekezo ambayo yamekuwa yakitolewa na mthibiti ubora, ili kuhakikisha mambo yanaenda sawa,”alisema Dkt Baganda.