"WALIMU SIMAMIENI MIONGOZO NA KUWA WABUNIFU ILI KUINUA KIWANGO CHA ELIMU"

Posted on: September 9th, 2022

Maafisa Elimu ngazi ya Kata, Wakuu wa shule na walimu wakuu katika Manispaa ya Singida wametakiwa kuwa welevu, kujituma kazini na maono yenye nia ya kuleta matokeo chanya, katika kutekeleza na kusimamia kwa ufanisi majukumu yao.

Afisa Elimu Msingi katika Manispaa ya Singida Omar Maje, amesema hayo wakati akifungua semina ya siku moja kwa kwa washiriki hao, juu ya miongozo ya uboreshaji elimu, inayoendelea kutolewa nchini na Ofisi ya Rais, Tawala za Mikoa na Serikali za Mitaa (OR-TAMISEMI).

Maje amesema kuwa, washiriki wa mafunzo hayo wanapaswa kusimamia miongozo hiyo kwa lengo la kuleta tija na mabadiliko katika nyanja ya elimu, ili kuinua kiwango cha ufaulu kwa wanafunzi na kuboresha ufundishaji kwa walimu.

Kwa mujibu wa Maje, miongozo hiyo ni “ Changamoto katika uboreshaji elimu ya Msingi na sekondari, nini kifanyike?” na “Mkakati wa  uboreshaji ufundishaji na ujifunzaji kwa elimu ya msingi”.

Afisa elmu huyo ameongeza kuwa, kupitia miongozo hiyo, mabadiliko makubwa katika taaluma yanatarajiwa kwa kuwa sasa inakweda kutafsiriwa kwa vitendo, katika ngazi zote za wadau wa elimu.

Maje amesisitiza kuwa hata hivyo utekelezaji wa miongozo hiyo, utahitaji usimamizi makini na shirikishi baina ya Wakuu washule, walimu Wakuu na maafisa elimu Kata na walimu wote katika shule, ili kuleta ufanisi.

“Ambaye anaona hataweza kusimamia miongozo hii, ajiandae kuachia nafasi yake…., tunataka viongozi wenye maono, kujituma na watakaoleta matokeo chanya kitaaluma…”, amesisitiza.

Mapema kabla ya ufunguzi, Kaimu Afisa Elimu Sekondari, Aminieli Mfinanga aliwataka washiriki kujenga tabia ya kuheshimu muda, wito na kuwatii viongozi wa ngazi mbalimbali, wakiwemo wale wa kisiasa na serikali.

Alisema mafanikio ya utekelezaji wa maagizo na maelekezo mbalimbali yanayotolewa, yatategemea utii na uwajibikaji katika kusukuma mbele gurudumu la maendeleo, kupitia sekta ya elimu.

Jumla ya washiriki 119 wakiwemo Maafisa Elimu Kata 18, Wakuu wa shule sekondari 25, walimu wakuu shule za msingi 63, aa wakufunzi 13, wameshiriki mafunzohayo maalumu kwa ajili ya kupitia miongozo ya uboreshaji elimu nchini.