WALIMU WAKUU MANISPAA YA SINGIDA WATAKIWA KUDHIBITI UDANGANYIFU WA MITIHANI

Posted on: July 7th, 2022

HALMASHAURI ya Manispaa ya Singida imewataka walimu Wakuu na walimu wa taaluma wa shule za msingi, kujipanga vyema katika maandalizi ya mtihani wa kujipima wa taifa, ikiwa ni maandalizi ya mtihani wa kumaliza elimu ya msingi mwaka huu, hapa nchini.

Afisa Elimu Msingi Omari Maje, alisema hayo jana 6 julai, 2022, wakati akifungua kikao kazi cha tathmini, mitihani ya utimilifu  ngazi ya mkoa, kilicho husisha walimu Wakuu, walimu wa taaluma na maafisa elimu kata, kilichofanyika ukumbi wa shule ya msingi Tumaini maalumu kwa wanafunzi wasiosikia.

Maje aliwataka washiriki hao kujifunza kutokana na mapungufu yaliyojitokeza kupitia matokeo hayo, hivyo kuepuka kujirudia kwa kosa kwenye mtihani ujao wa taifa, huku akisistiza kwamba matokeo mazuri yanawezekana iwapo wataepuka udanganyifu.

“Mimi sio muumini kabisa wa udanganyifu, na ninyi mnapaswa kuwa hivyo, waumini wa ukweli…ukiwa mkweli utafanikiwa katika kazi, na mikakati yetu itawezekana kwa kuhakikisha kwa Pamoja tunainua kiwango cha elimu kwa manispaa yetu” alisema Maje

Aidha, Afisa elimu huyo alitumia fursa hiyo kuwataka washiriki hao kutumika vizuri fursa hiyo na kuzibaini changamoto zinazowakabili walimu zinazosababisha kushuka kwa kiwango cha ufaulu, katika masomo wanayofundisha.

Afisa elimu huyo pia alimpongeza mwalimu mkuu wa shule ya msingi kibaoni, mwalimu wa taaluma na Afisa elimu kata ya Kindai, kwa kazi nzuri waliyofanya, hadi shule hiyo kutoa mwanafunzi wa kwanza kimkoa katika mtihani wa utimilifu wa mkoa, hivyo kuiletea heshima kubwa Manispaa ya Singida.

Kwa upande mwingine Mkuu wa Idara ya Utawala na Rasilimali watu Ndg. kulanga Kanyanga, aliwapongeza washiriki kwa mafanikio waliyopata, na kueleza kuwa Ofisi yake inaendelea na mchakato wa sera ya motisha, kwa shule na walimu watakaofanya vizuri. Aidha alibainisha kuwa hata kwa walimu ambao shule zao zitafanya vibaya nao watapata motisha hasi ili iwe funzo na baadaye waongeze juhudi katika kuinua kiwango cha elimu ili kukwepa motisha hiyo.

“ Ninyi mmeaminiwa kwa ajili ya kuhudumia watoto, timizeni wajibu wenu kama ambavyo serikali inatimiza wajibu wake kwenu…” alisema Kulanga.

Akizungumzia suala la malipo ya mapunjo ya mishahara kwa watumishi, Kulanga alisema kuwa, hadi sasa jumla ya watumishi 136 tayari wameshalipwa mapunjo yao yanayofikia kiasi cha Tshs. 187,420,941/51, yakiwa ni malimbikizo kwa mishahara ya miaka ya nyuma, hadi sasa.

Hata hivyo, Kulanga aliwataka watumishi wote kuwajibika  ipasavyo katika majukumu yao, kwani serikali wanayoitumikia ni sikivu na inawajali, na kwamba mbali na mapunjo yao, hata madai mengine pia yanashughulikiwa kulingana na taratibu, kanuni na sheria za serikali.

“ Ninyi wenyewe ni mashuhududa  baadhi ya walimu hapa walikuwa wanadai malimbikizo ya miaka mpaka 10  iliyopita na  tayari wamelipwa haki zao…” alisema Kulanga.

Naye Mthibiti Ubora wa Elimu Manispaa ya Singida Ndg. Seif Mziray, alitumia fursa hiyo kuwaasa washiriki hao, kutotumia kigezo cha upungufu wa walimu kama sababu ya shule zao kufanya vibaya kwenye mitihani, na akasisitiza watimize vema wajibu wao.

“ Msijifiche kwenye mwamvuli wa upungufu wa walimu, Mwalimu kama ana vipidi 30, ni wajibu wake kuhakikisha anafundisha vipindi vyote, lakini sababu ya upungufu wa walimu, kwa kweli hiyo sio sababu ya msingi” alisema Mziray

Aliwataka walimu kuhakikisha wanafuatilia mahudhurio ya wanafunzi ili yapande, na kwa shule ambazo mahudhurio ni dhaifu, basi  ni jukumu la uongozi wa shule kushirikisha kamati za shule, wazazi, Serikali za Vijiji, mtaa na kata, kumaliza tatizo hilo.

Manispaa ya Singida ilipata asimia 67.69 ya ufaulu katika mitihani ya utimilifu kimkoa, ambapo jumla ya wanafunzi 5,339 walifanya mitihani hiyo kati ya 5,529 waliosajiliwa Baraza la mitihani  mwaka 2016.

Katika mafunzo hayo, jumla ya walimu wakuu 44, walimu wa taaluma 43 na maafisa elimu Kata 9 walishiriki kikao hicho cha tathmini, kwa lengo la kuboresha sekta ya elimu ya msingi, Manispaa ya Singida.