WANAFUNZI WANAORIPOTI KIDATO CHA KWANZA WAFIKIA ASILIMIA 36

Posted on: January 9th, 2024

Jumla ya wanafunzi 1873 wa kidato cha kwanza katika Shule za Sekondari za Manispaa ya Singida sawa na asilimia 36.30, wameweza kuripoti katika shule walizopangwa hadi kufikia Januari 9,2024.

Kwa mujibu wa taarifa ya hali ya kuripoti wanafunzi wa Kidato cha kwanza mwaka huu,iliyowasilishwa katika kikao kilichoitishwa na Mkuu wa Mkoa wa Singida, Peter Serukamba, wanafunzi hao wamepokelewa bila masharti ikiwa ni maagizo kutoka Ofisi ya Rais Tawala za Mikoa na Serikali za Mitaa (TAMISEMI).

Taarifa hiyo imeonesha Wanafunzi hao 1873 ambapo wasichana ni 1098 na wavulana 775 walioripoti, ni kati ya wanafunzi 5160 ambao wanatakiwa kuripoti katika shule mbalimbali katika Manispaa ya Singida wasichana wakiwa 2603 na wavulana 255. Zoezi la kuripoti linaendelea.

Afisa Elimu Sekondari Manispaa ya Singida, Athuman Mnyusi, katika kuhakikisha wanafunzi wote waliofaulu wanaripoti shuleni, amefanya uhakiki katika baadhi ya shule ili kujionea hali halisi ya mapokezi ya wanafunzi hao ikiwa ni pamoja na kupokea changamoto zilizojitokeza na kuzitatua.

Shule zilizotembelewa ni pamoja na Sekondari za Mughanga, Dk Salmin Amour, Utemini, Maharu, Mandewa, Manga, Mtipa na Uhamaka.

Kiongozi huyo pamoja na mambo mengine amewasisitiza walimu kuhakikisha wanafunzi wanaripoti bila masharti yoyote kwani mazingira na miundombinu ya shule inakidhi vigezo.

Aidha Mnyusi amewaasa wanafunzi hao wapya kuhakikisha wanahudhuria vipindi na kuepuka utoro kwani shule zote zinamazingira salama kwa ajili ya kujifunzia na kufundishia.

Lengo la Serikali ya Tanzania ni kuona kila mtoto aliyefaulu anaripoti mara moja na kuanza masomo hata kama hana sare za shule wakati taratibu nyingine zikiendelea.