WANANCHI WA MANISPAA YA SINGIDA WAJITOKEZA KWA WINGI KUPELEKA WATOTO KUPATA CHANJO YA POLIO

Posted on: May 19th, 2022

Wananchi katika Manispaa ya Singida wamejitokeza kwa wingi katika kupeleka Watoto wao kupata chanjo ya polio kufuatia kampeni ya chanjo ya polio iliyozinduliwa Kimkoa katika wilaya ya Mkalama tarehe 18.05.2022 na Mkuu wa Mkoa wa Singida Dr. Binirith Mahenge .

Akizungumzia hali ya utoaji chanjo Mratibu wa chanjo wa Manispaa ya Singida Bi. Digna Sakaya  amesema lengo la Manispaa ya Singida ni kuchanja Watoto 27,687 na kwamba lengo kwa kila kituo kwa siku ni kuchanja Watoto 150 na wasiopungua 100.

Mratibu huyo amesema kwa tarehe 18.05.2022 pekee zaidi ya watoto 7,000 wamechanjwa katika vituo 18 vya kutolea huduma na timu ya watoa huduma 44 wanaotoa chanjo kwa utaratibu wa kupita  nyumba kwa nyumba katika Manispaa ya Singida.

“Zoezi linaendelea vizuri na mwitikio ni mkubwa kutokana na uhamasishaji uliofanyika kwa kina na kufanya wananchi kuitikia vizuri ingawa wachache sana  wamekuwa wagumu” amesema Bi. Sakaya

Manispaa ya Singida inatoa chanjo ya polio katika vituo 18 vya kutolea huduma vya binafsi na vya Serikali ambapo vituo 8 kati ya hivyo vipo maeneo ya mjini.