WASAJILI WA ANWANI ZA MKAZI WAASWA KUWA WAZALENDO KATIKA KUTEKELEZA ZOEZI HILO.

Posted on: March 16th, 2022

Vijana 300 wa ajira za muda za usajili wa anwani za makazi na wenyeviti wa mitaa 53 leo tarehe 16.03.2022 wamepatiwa mafunzo ya usajili/uandikishaji anwani za makazi na kuaswa kutanguliza uzalendo mbele katika utekelezaji wa zoezi hilo.

Akifungua mafunzo hayo, Kaimu Mkurugenzi wa Manispaa ya Singida Jeshi Lupembe alisema wananchi na hasa watekelezaji wa zoezi hili kwa pamoja wanapaswa kuonesha uzalendo ili kuweza kufanikisha zozi la usajili anwani za makazi katika muda mfupi na kwa ufanisi mkubwa.

Aidha amesema kwa kuzingatia  maelekezo / maagizo ya serikali kila mtaa utawajibika kuweka nguzo na kibao cha kuutambulisha mtaa wao. Pamoja nayo  amewataka pia wale wote waliopewa majina ya mtaa kuonesha uzalendo kwa kujitoa kugharamia kibao cha mtaa chenye jina lake.

“ uzalendo ni pamoja na kuchangia gharama kama hizo za uwekaji nguzo na vibao lakini kubwa zaidi ni kujitoa kufanikisha zoezi hili, tuwe wazalendo ndugu zangu kwa ajili ya manispaa yetu”, alisisitiza Jeshi

Aliendelea kusema ni vyema viongozi katika ngazi zote kushirikiana kwa kuwa na nia na lengo moja ili kufanikisha zoezi hili na kwamba kwa mshikamano huo ni dhahiri Manispaa ya Singida itaongoza kwa kazi nzuri yenye ufanisi mkubwa.

Manispaa ya Singida inatarajia kusajili majengo yanayokadiriwa kufikia idadi ya 49,000 na nguzo / vibao 7,000 vinatarajiwa kusimikwa katika mitaa.