WATAALAMU WA LISHE WATAKIWA KUHAKIKISHA UTAPIAMLO UNAKWISHA KABISA MANISPAA YA SINGIDA

Posted on: May 6th, 2023

Mkuu wa wilaya ya Singida Mhandisi Paskas Muragili amewataka maafisa lishe na watendaji wa kata katika Manispaa ya Singida kuhakikisha changamoto za lishe zinazopelekea utapiamlo zinatatuliwa na kumaliza kabisa tatizo hilo katika Manispaa ya Singida.

Muragili ametoa agizo hilo katika kikao cha robo ya tatu cha Kamati ya lishe wilaya kilichofanyika katika Ukumbi wa Manispaa ya Singida na kuhudhuriwa na wataalamu wa Afya, watendaji wa kata, wajumbe wa kamati ya Usalama Wilaya pamoja na wakuu wa Idara na Vitengo ambao ni wajumbe katika kamati hiyo.

Amewataka watendaji hao kufanya ufuatiliaji wa karibu hasa kwa zile kaya zenye changamoto za lishe kabla ya tatizo hilo kufikia hatua mbaya ambayo ni utapiamlo mkali.

“familia zenye changamoto za lishe ama utapiamlo tunaishi nazo , tunazifahamu tuzifuatilie ili kuzitambua mapema ili kuwapatia huduma mapema, ameagiza Muragili.

Kwa upande mwingine Mkuu huyo wa wilaya ametoa agizo kwa maafisa lishe  la kuanzisha programu ya upimaji madini joto katika chumvi mashuleni na kwenye minada.

Amesema mfanyabiashara mnadani ambaye chimvi yake itabainika kukosa madini joto, bidhaa hiyo itaifishwe mpaka hapo atakapolipia na chumvi hiyo kuwekwa madini joto tayari kwa matumizi.

Mkuu wa wilaya Mhandisi Paskas Muragili pia amesisitiza kila shule kuwa na mpango wa utoaji wa chakula shuleni na kuongeza kuwa wataalamu wa lishe wahusike kushauri ubora wa chakula kinachotolewa ili kuhakikisha chakula hicho kina virutubisho vya kuimarisha mwili.

Naye Afisa Lishe wa Manispaa ya Singida Isaac Maseri, amesema kati ya kina mama 9092, ni kinamama 8,796  waliopatiwa vidonge vya kuongeza damu , lengo likiwa ni kuhakikisha mama anapojifungua anakuwa na damu ya kutosha pindi ili kuepuka kupoteza maisha kutokana na ufinyo wa damu.

Amesema pamoja na vidonge hivyo, elimu ya ya ulaji  vyakula vya kuongeza damu imeendelea kutolewa ili kuwawezesha kinamama wajawazito kuwa na damu ya kutosha ili kuondokana na tatizo la kupoteza damu nyingi wakati wa kujifungua.

Wakiunga mkono suala la elimu baadhi ya watendaji wa kata wamesema bado kuna haja ya elimu juu ya lishe bora kutolewa kwa jamii ili kuepukana na chanmaoto ya utapiamlo  lakini pia upungufu wa damu  hasa kwa kina mama wajawazito.