WATENDAJI WA KATA WAHIMIZWA KUSHIRIKISHA WANANCHI KWENYE MIRADI YA MAENDELEO

Posted on: August 10th, 2023

Mstahiki Meya wa Manispaa ya Singida, Yagi Maulid Kiaratu, amewapongeza watendaji wa Kata na madiwani , kwa usimamizi bora wa utekelezaji wa miradi ya maendeleo inayofanyika kwenye Kata zao.

Pongezi hiyo, alizitoa leo tarehe 10, Agosti 2023, kupitia mkutano wa Baraza la Madiwani wa Manispaa ya Singida, uliofanyika katika ukumbi wa maktaba wa Shule ya Sekondari Mwenge, ambapo Madiwani waliweza kuwasilisha taarifa za maendeleo za Kata zao kwa kipindi cha robo ya nne,  Aprili hadi Juni 2023.

Pamoja na pongezi hizo, Mstahiki Meya, aliwahimiza watendaji na madiwani kuhamasisha wananchi  ili waweze kushiriki vyema, kwenye miradi iliyopatiwa fedha Serikali na ili kuweza kuikamisha kwa wakati.

Aidha amewaasa watendaji wa Kata, kuendelea kujifunza kutokana na changamoto zilizojitokeza wakati wa utekelezaji wa miradi katika kipindi kilichopita ndani ya kata zao.

“Nawapongeza watendaji wote wa Halmashauri ya Manispaa ya Singida, kwa kusimamia vizuri fedha za miradi ya maendeleo, zilizotolewa na Serikali katika kata zenu, kwa ajili ya miradi ya maendeleo”, alisema Kiaratu.

Kwa upande wake, Mbunge wa Jimbo la Singida Mjini, Mussa Sima, amesema kuwa  suala la ushirikishwaji wananchi ni jambo muhimu  katika kuendeleza na kuilinda miradi ya maendeleo, ili kuondoa mkanganyiko  kwa jamii.

“…. wananchi washirikishwe katika kutekeleza miradi, pia wahamasishwe kushiriki katika mikutano mbalimbali ilikupata taarifa za mapokezi ya fedha za miradi zinazotolewa na serikali, ili kuondoa mkanganyiko kwa jamii, juu ya miradi inakotekelezwa”, amesema Sima.