WATENDAJI WAAGIZWA KUELIMISHA JAMII KATIKA MPANGO WA KUOKOA MAISHA YA MAMA NA MTOTO (M-MAMA)

Posted on: July 20th, 2023

Watendaji wa kata na watoa huduma za afya wameagizwa kushirikisha jamii kikamilifu katika mpango wa kuokoa maisha ya mama na mtoto ili kupunguza na kuondoa kabisa vifo vitokanavyo na uzazi.

Mkuu wa Wilaya ya Singida Mhandisi Paskasi Muragili ametoa agizo hilo jana tarehe 19, Julai 2023 katika kikao cha kamati ya lishe Wilaya cha robo ya nne 2022/2023 katika Manispaa ya Singida  kilichofanyika katika ukumbi wa Halmashauri ya Manispaa ya Singida.

Mhandisi Muragili amehimiza kuhakikisha jamii, watoa huduma ya afya na wote walioainishwa katika mfumo wa M-MAMA wanapatiwa elimu ya kina ili kuwawezesha kutekeleza mpango huu kwa ufasaha “Ninaagiza elimu itolewe kwa jamii ikiwemo madereva waliopo katika mfumo wa M-MAMA ili washiriki kikamilifu katika kuokoa maisha ya mama na mtoto……”, amehimiza Muragili

M-MAMA ni mfumo ulioanzishwa rasmi na Mh. Rais Dr. Samia Suluhu Hassan  kwa ajili ya usafirishaji wa dharula kwa wakina mama wajawazito na watoto wachanga ambao umesadia kuboresha huduma za Afya kwa mama na mtoto hasa waliopo mbali na vituo vya Afya kwa kurahisisha mawasiliano na uchukuzi baina ya muhusika na vituo vya Afya.

Pamoja na hayo Mkuu wa Wilaya ambaye ni Mwenyekiti wa kamati ya lishe Wilaya ametoa msisitizo pia kuhusu swala la uchangiaji chakula shuleni na kutoa agizo kuwa kila shule ihakikishe inatoa walau mlo mmoja kwa wanafunzi kwa kutwa.

Aidha amewataka wazazi kushiriki kwa kuchangia utoaji wa huduma ya chakula shuleni na kwamba mzazi atakayeshindwa kufanya hivyo kufwatiliwa na kuhakikisha anashiriki kuchangia huduma hiyo..

“………wazazi washiriki kuchangia chakula cha wanafunzi shuleni asiyefanya hivyo afuatialiwe” ……..amesisitiza Mkuu wa Wilaya.

Mwenyekiti huyo wa kamati ya lishe ameendelea kusisitiza elimu juu ya lishe na kutoa wito kwa maafisa lishe kutoa elimu juu ya mlo kamili kwa kutumia vyakula vinavyopatika ndani ya jamii .

Muragili ametoa wito kwa watendaji wa kata kuhakikisha wanapata alama ya kijani katika kipengele cha lishe katika kadi alama ya lishe ‘score card’ na taarifa ya utekelezaji wake kutolewa katika kikao cha kamati lishe robo ya kwanza 2023/2024.

Mkuu huyo wa Wilaya amesema upatikanaji wa alama ya kijani utawezekana kwa kuzingatia sheria ndogo za lishe, kuanzisha klabu za lishe ngazi za jamii na kuelimisha jamii kupeleka nafaka katika mashine maalum ili kuongezewa virutubisho. Mpaka sasa jumla ya mashine kumi zimefungwa katika kata nne ambazo ni Mitunduruni, Kindai, Misuna na Mandewa kutokana na uwepo wa wazalishaji na wafungashaji wakubwa wa unga katika kata hizo.