WATUMISHI MANISPAA YA SINGIDA WAASWA KUACHA KUFANYA KAZI KWA MAZOWEA

Posted on: June 14th, 2022

Watumishi Manispaa ya Singida wametakiwa kuacha kufanya kazi kwa mazowea na kuwajibika ipasavyo kwa wananchi ambao wapewa dhamana ya kuwahudumia kupitia utaalamu wao.

Hayo yamesemwa na Mstahiki Meya wa Manispaa ya Singida Mhe. Yagi Kiaratu (13.06.2022) wakati akizungumza na watumishi wa kata tatu za Ipembe, Majengo na Misuna katika kikao kazi kilichoandaliwa na ofisi ya Mkurugenzi wa Manispaa hiyo ikiwa ni utaratibu uliowekwa wa kuzungumza na watumishi katika kata.

Mhe. Yagi ambaye pia ni Diwani wa Kata ya Majengo alisema vikao kama hivi ni Sehemu ya kukumbushana wajibu wa kiutumishi ambao kwa namna moja ama nyingine watumishi wamekuwa wakijisahau ama kurithi masuala ya kiutendaji ambayo ni kinyume na taratibu za kiutumishi kutoka kwa watangulizi wao hivyo kuathiri utoaji huduma kwa Jamii.

“Forum kama hii inawakumbusha kuwajibika kwa kada mnayoitumikia pia kwa Jamii inayowazunguka ili iendelee kujenga imani na nyie kwa uadilifu unaouonesha” alisisitiza Mhe. Yagi

Alisema elimu nzuri na utaalamu walionao Watumishi hauna faida kama hawataweza kuionesha kupitia huduma bora kwa Jamii na mahusiano mazuri baina yao na Jamii inayowazunguka na kuongeza kuwa ni jukumu la watumishi kujenga taswira nzuri ya Serikali kupitia uwajibikaji wao.

“Tumieni nafasi hii kuzungumzia changamoto zinazowakabili ambazo kwa namna moja ama nyingine zinaathiri utendaji kazi wenu” alisisitiza.

Aidha amemtaka Mkurugenzi wa Manispaa pamoja na masuala mengine kuhakikisha usalama wa watumishi unakuwepo wawapo kazini hii ikiwa ni pamoja na mazingira wanayofanyia kazi na kutatua changamoto zinazowakabili kwa wakati.

Mhe. Yagi amesema ofisi ya Mkurugenzi ina wajibu wa kujenga mahusiano mazuri na vyama vya wafanyakazi ili kuweza kushirikiana pamoja katika kutatua migogoro ya wafanyakazi na changamoto zinazowakabili kabla ya kupelekana mbele ya sheria.

Ametoa rai kwa Watumishi kuwajibika ili kuleta matokeo chanya na kuongeza kuwa ni aibu kwa mtumishi kulalamikia Serikali wakati hana alichoitendea Serikali ambacho kinapimika na kusema kuwa haki ni lazima iendane na wajibu.

“kabla hujailalamikia Serikali hebu jiulize wewe umeitendea nini Serikali”, alisistiza mhe. Yagi

Alisema watumishi wa Serikali popote walipo ni jeshi la Mhe. Rais na wanawajibika kuitendea haki Serikali kwa kutoa huduma iliyo bora kwa wananchi na kuitendea haki nafasi yake aliyopewa kama mtumishi wa umma.

“Watumishi mnauza huduma hivyo wateja wenu ambao ni Jamii lazima waridhike na huduma mnazotoa kupitia lugha nzuri, uwajibikaji bora na mahusiano mazuri” aliasa Mhe. Yagi

Mkakati wa Manispaa ya Singida wa kuzungumza na watumishi wa kata ni endelevu  ili kuiwezezesha Halmashauri kubaini changamoto zinazowakabili watumishi wake na hivyo kuzitatua kwa wakati na kuboresha utendaji kazi wa watumishi.