WATUMISHI SEKTA YA AFYA WATAKIWA KUWAJIBIKA, WABINIFU KUMALIZA CHANGAMOTO

Posted on: August 12th, 2023

Mkurugenzi wa afya, ustawi wa jamii na lishe ofisi ya Rais, Tawala za Mikoa na Serikali za Mitaa, Dkt. Ntuli Kapologwe, amewaka viongozi na watumishi wa umma nchini, hasa sekta ya afya, kuwajibika na kuwa wabunifu ili kupunguza changamoto za utoaji huduma za afya.

Dkt Ntuli, amesema hayo leo Agosti 12, 2023, katika kikao cha majumuisho kilichohusisha halmashauri zote saba za mkoa wa Singida, kilichofanyika kwenye ukumbi wa mikutano wa ofisi ya Mkuu wa Mkoa.

Mkurugenzi huyo amesema kuwa, kila mtu kwa nafasi yake anapaswa kuwajibika kwenye eneo lake la kazi, ili kubaini mapungufu na kuboresha kwa kuweka mazingira bora na wezeshi ya  upatikanaji kwa huduma ya afya kwa jamii,

“Tusipowajibika ipasavyo katika kutoa huduma, ni sawa na kumchonganisha Mheshimiwa Rais na wananchi wake…sitamvumilia mtu anayeshindwa kuwajibika kwa ajili ya maendeleo ya Taifa,”amesema Dkt. Ntuli.

Amesema kuwa, Rais Samia Suluhu Hassan, amefanya kazi kubwa katika kuwajali wananchi wake, kwa kuwajengea vituo vya afya, zahanati na hospitali, lakini amehakikisha kuna uwepo wa kutosha wa dawa, vifaa tiba na watumishi.

Kutokana na hali hiyo, Dkt. Ntuli amewataka wataalamu wa afya kuhakikisha, wanawahudumia wananchi ipasavyo, ili kuondoa mapungufu ambayo yamekuwa yakilalamikiwa na wananchi.

Kuhusu watumishi wapya wanaoajiriwa katika sekta ya afya, Dkt. Ntuli ametoa agizo la kuhakikisha wanapelekwa kwenye vituo walikopangiwa, badala ya kuachwa makao makuu, hali inayowakosesha wananchi haki ya kupata huduma muhimu za kitabibu, pia ni njia moja wapo ya kuwajengea uzoefu watumishi hao katika suala zima la utoaji huduma.

Aidha Dkt. Ntuli ameasa watumishi kufanya kazi kwa weledi na ushirikiano, kwa ngazi zote, lengo likiwa ni kufanikisha kile kilichokusudiwa na serikali katika kutoa huduma bora kwa wananchi, kinapatikana.

Pia Dkt. Ntuli amewataka watumishi kuelezea huduma mbalimbali zinazotolewa na vituo vinavyotoa huduma za afya, ili kushawishi wananchi, kuzifuata na hivyo kuondokana na dhana kwamba vituo vya afya vya umma, havitoi huduma bora.

Mkurugenzi wa Manispaa ya Singida Jeshi Godfrey Lupembe, amemhakikisha Mkurugenzi wa afya, ustawi wa jamii na lishe ofisi ya OR – TAMISEMI kuwa atsimamia suala zima la uwajibikaji ili kuhakikisha huduma za afya zinapatikana kwa kiwango kilichokusudiwa

“ nimepokea maelekezo, na ninaahidi kuyafanyia kazi……. Hata sisi wote hapa tumeanzia chini lakini kutokana na uwajibikaji mzuri leo tupo hapa tulipo…” amesema Jeshi.