WAZIRI BASHIRU AFANYA ZIARA YA KUSHITUKIZA KWA MFUGAJI MDOGO

Posted on: January 10th, 2026

Waziri wa Mifugo na Uvuvi, Mhe. Balozi Dkt. Bashiru Ally Kakurwa, Januari 10, 2026, amefanya ziara ya kushtukiza kwa mfugaji mdogo wa mfano mkoani Singida, hatua iliyolenga kujifunza na kujionea kwa vitendo namna mfugaji huyo anavyoendesha shughuli zake za ufugaji.

Dkt. Bashiru alifika katika ziara hiyo akiwa ameambatana na viongozi wa Mkoa wa Singida pamoja na watendaji waandamizi kutoka Wizara ya Mifugo na Uvuvi, ambapo alizungumza na mfugaji huyo na kujionea mbinu mbalimbali zinazotumika katika kuboresha uzalishaji.

Akizungumza wakati wa ziara hiyo, Waziri Bashiru alisema Serikali inaendelea kuhimiza ufugaji wa kisasa na wenye tija kwa wafugaji wadogo, akisisitiza kuwa kujifunza kutoka kwa mifano halisi ya mafanikio ni njia mojawapo ya kuboresha sekta hiyo.

“Tunataka kuona wafugaji wadogo wanabadilika kutoka ufugaji wa jadi kwenda ufugaji wa kisasa unaozingatia tija, afya ya mifugo na masoko. Ndiyo maana tunakuja kujifunza moja kwa moja kwa wafugaji wanaofanya vizuri,” alisema.

Kwa upande wake, mfugaji huyo alimshukuru Waziri kwa ziara hiyo ya kushtukiza, akisema imempa hamasa na motisha ya kuongeza juhudi katika shughuli zake za ufugaji, huku akiomba kuendelea kupatiwa elimu na msaada wa kitaalamu kutoka kwa Serikali.

Viongozi wa mkoa huo walisema ziara hiyo ni chachu kwa wafugaji wengine kuiga mbinu bora za ufugaji na kuchangia kukuza uchumi wa wananchi wa Singida kupitia sekta ya mifugo.

Ziara ya Waziri Bashiru ni sehemu ya juhudi za Serikali katika kuimarisha sekta ya mifugo nchini kwa kuzingatia uzalishaji wenye tija, kipato kwa wafugaji na mchango wa sekta hiyo katika uchumi wa taifa.