WAZIRI CHANA AZIZINDUA KAMPENI YA MSAADA WA KISHERIA YA MAMA SAMIA MKOANI SINGIDA

Posted on: January 10th, 2024

Waziri wa Katiba na Sheria, Pinda Chana leo Januari 10, 2024 amezindua rasmi Kampeni ya Msaada wa Kisheria ya Mama Samia (Mama Samia Legal Aid Campaign) mkoani Singida ambayo lengo lake ni kulinda na kukuza upatikanaji wa haki kwa watu wote kupitia huduma ya msaada wa kisheria nchini ambao ni utekelezaji wa katiba yetu ya Jamhuri ya Muungano wa Tanzania na Ilani ya Chama cha Mapinduzi ya 2020-2025.

Kampeni hii kwa upande wa Tanzania Bara ilizinduliwa na Waziri Mkuu wa Jamhuri ya Muungano wa Tanzania, Mh. Kassim Majaliwa, Aprili, 2023 na kwa upande wa Zanzibari ilizinduliwa Mei, 2023 na hadi sasa mikoa isiyopungua takribani mitano imefikiwa na kampeni hii.

Waziri Chana amezindua kampeni hiyo leo Mkoani Singida katika kiwanja cha Stendi ya Zamani kilichopo Halmashuri ya Manispaa ya Singida ukihudhuriwa na viongozi mbalimbali wa serikali, chama, taasisi pamoja na wananchi.

Chana alisema kuwa Rais wa Jamhuri ya Muungano wa Tanzania lengo lake ni kuona wananchi wanapata msaada wa huduma za Kisheria hasa kwa wananchi wanyonge na kuwapatia elimu ya kutosha juu ya haki zao hususani kwa wanawake na watoto kwa maeneo yote.

Kampeni hii ya msaada wa kisheria dhumuni lake ni kuongeza uelewa wa kisheria na haki za kibinadamu kwa jamii hususani haki za wanawake na watoto, kuimarisha huduma za ushauri wa kisheria kwa waathirika wa ukatili wa kijinsia, kuongeza uelewa wa masuala ya usimamizi wa mirathi na urithi sheria za ardhi na haki za kumiliki ardhi na Mali na utatuzi wa migogoro kwa njia mbadala hususani kwa viongozi wa serikali za mitaa.