WAZIRI CHANA AZUNGUMZA NA WANAFUNZI WA SEKONDARI MANDEWA

Posted on: August 3rd, 2023

Waziri wa Michezo, Sanaa na Utamaduni, Pindi Chana, amefanya ziara katika Manispaa ya Singida na kutembelea maeneo mbalimbali, ikiwemo kuzungumza na wanafunzi wa shule ya Sekondari Mandewa.

Akizungumza na wanafunzi wa sekondari ya Mandewa, Waziri Chana, aliwataka wanafunzi wa shule hiyo maalumu kwa michezo mbalimbali kimkoa, kuzingatia masomo, pia bila kusahau suala la michezo.

Amesema ili waweze kufanikiwa katika hayo yote, suala la nidhamu ni muhimu ili kuiweka akili sawa kumudu masomo na mazoezi yatakayohimili ushindani katika michezo.

“Serikali inaendelea na ukarabati wa viwanja mbalimbali na hivi sasa ipo kwenye mazungumzo na kampuni mmoja inayojihusisha na ushauri, ili serikali iweze kujenga miundombinu ya viwanja vingi hapa nchini,” alisema waziri Chana.

Aidha kuhusus elimu, Waziri huyo ametoa rai kwa wanafunzi kote nchini kuongeza bidii ya masomo, ili hatimaye waweze kuwa na ufaulu mzuri utakaowasaidia kuendelea na masomo ya elimu ya juu na kufanikiwa baadaye katika maisha yao.