WAZIRI LUKUVI AZINDUA MAONESHO YA SABA YA MIFUKO NA PROGRAMU ZA UWEZESHAJI WANANCHI KIUCHUMI

Posted on: September 10th, 2024

Waziri wa Nchi Ofisi ya Waziri Mkuu Sera, Bunge na Uratibu. Mhe William Lukuvi, amezindua rasmi Maonesho ya Saba ya Mifuko na Programu za Uwezeshaji Wananchi Kiuchumi kwa Kanda ya Kati, yanayofanyika katika Manispaa ya Singida, Mkoa wa Singida.

Waziri Lukuvi aliyeongoza uzinduzi wa maonesho haya, alitumia fursa hiyo kutembelea mabanda mbalimbali ya maonesho ili kujionea shughuli na mipango inayotolewa kwa wananchi kwa lengo la kuwawezesha kiuchumi.

Katika hotuba yake, Waziri Lukuvi alieleza umuhimu wa maonesho hayo katika kukuza uchumi wa wananchi na kutoa fursa kwa wadau wa maendeleo kuonyesha michango yao.

“Maonesho haya ni sehemu muhimu ya juhudi zetu za kuhakikisha kwamba wananchi wa Kanda ya Kati wanapata fursa za maendeleo kupitia mifuko na programu mbalimbali za uwezeshaji. Tunataka kuona wananchi wanakua kiuchumi na kujitegemea kupitia mipango hii,” alisema Waziri Lukuvi.

Maonesho haya yanashirikisha mikoa sita, ikiwemo Singida, Manyara, Tabora, Dodoma, Dar es Salaam, na Shinyanga. Katika kipindi hiki, wananchi wataweza kujifunza kuhusu fursa za mikopo, mafunzo ya ujasiriamali, na ushauri wa kitaalamu kwa ajili ya maendeleo yao.

Kwa mara nyingine, maonesho haya yanaangazia juhudi za serikali katika kuboresha hali ya maisha ya wananchi kupitia mipango ya maendeleo na uwezeshaji kiuchumi, huku yakileta pamoja wadau kutoka mikoa mbalimbali kwa malengo ya pamoja ya maendeleo.

Maonesho haya yalianza tarehe 8 Septemba na yatafungwa tarehe 14 Septemba mwaka huu.