WAZIRI MKUU KASSIM MAJALIWA ARIDHISHWA NA USIMAMIZI WA MRADI WA UPANUZI WA HOSPITALI YA RUFAA MKOANI SINGIDA

Posted on: August 6th, 2022

WAZIRI Mkuu Kassim Majaliwa amesema leo tarehe 06 Agosti, 2022, kuwa Serikali itaendelea kuboresha na kutekeleza miradi mipya ya Maendeleo ikiwemo sekta ya afya, elimu, maji na miundombinu yenye tija kwa wananchi wa Tanzania.  

Waziri Mkuu amesema hayo, wakati anakagua maendeleo ya ujenzi wa Mradi wa upanuzi wa hospitali ya rufaa mkoa wa Singida , unaotekelezwa kwenye kata ya Mandewa, katika Manispaa ya Singida, na akaeleza kuridhishwa na utekelezaji wake.

Mradi huo unaohusisha ujenzi wa ghorofa tatu, ikiwemo sehemu ya wagonjwa wa dharuala, UVIKO-19, wagonjwa mahututi (ICU) na nyumba za mtumishi, ambavyo kwa pamoja unagharimu shilingi Bilioni 19.5

Moja ya sehemu ya jengo hilo la ghorofa tatu, litawezesha huduma za mama na mtoto,  upasuaji mkubwa na mdogo, kwa pamoja likiwa na uwezo wa kulaza wagonjwa  400, kwa mara moja.

Kutokana na mradi huo, Waziri Mkuu amepongeza usimamizi Madhubuti wa ujenzi unaofanyika na akazitaka mamlaka husika kuhakikisha zinashirikisha jamii katika hatua zote muhimu, za utekelezaji.

Mwenyekiti wa Chama Cha Mapinduzi (CCM) Mkoa wa Singida, Alhaji Juma Kilimba, amesema kuwa, makubaliano baina ya chama na wananchi wa Mkoa wa Singida kwa kipindi cha miaka mitano, ni kuhakikisha Serikali inatatua kero mbalimbali za wananchi, ikiwemo kero za afya, maji, elimu na barabara.

“CCM imeridhishwa na kazi nzuri ya usimamizi wa Mradi huu mkubwa wa afya, hivyo nawaomba wananchi waendelee kuunga mkono kazi nzuri inayofanywa na Rais wetu mpendwa, Mama Samia Suluhu Hassan”, alisema Kilimba.

Aidha Mwenyekiti huyo alimhakikishia Waziri Mkuu kuwa CCM Mkoa wa Singida inayo mahusiano na ushirikiano imara baina yake na watumishi wa Umma na kupelekea  mafanikio katika utekelezaji na usimamizi shirikishi wa miradi ya Maendeleo.

Kwa upande wake Mbunge wa Singida Mjini, Mussa Sima, amemwomba Waziri Mkuu  kuipatia Halmashauri ya Manispaa ya Singida fedha kwa ajili ya ujenzi wa shule mpya ya sekondari ya Utemini baada ya majengo ya shule hiyo kuathiriwa na wa nyufa kubwa zinazohatarisha maisha ya wanafunzi na walimu.

Amesema, kutokana na tatizo hilo, wanafunzi zaidi ya 700, wamelazimika kuhamia kwenye shule jirani hali inayozorotesha maendeleo ya wanafunzi na ugumu wa kufanya kazi kwa walimu wao.

Akijibu ombi hilo, Waziri Mkuu Kassim Majaliwa, ameahidi kuwasiliana na Wizara husika (TAMISEMI), ili kulitafutia ufumbuzi wa haraka.

Hata hivyo amesema kuwa, hivi sasa Serikali inaendelea na ukarabati wa shule  kongwe nchini, ikiwemo sekondari ya Mwenge iliyopo Manispaa Singida, Tumaini na Chuo cha Ualimu Kinampanda  kutokana na uchakavu wa Miundombinu ya Taasisi hizo.