WAZIRI PINDA ATEMBELEA BANDA LA MANISPAA YA SINGIDA

Posted on: August 6th, 2024

Waziri Mkuu wa Mstaafu, Mhe Mizengo Pinda, leo amefanya ziara ya kutembelea banda la Halmashauri ya Manispaa ya Singida, ambapo alikagua shughuli mbalimbali ambazo zinafanywa na wajasiriamali pamoja na kukagua mabanda ya mifugo.

Katika ziara hiyo, Pinda aliongozana na Mkuu wa Wilaya ya Singida, Godwin Gondwe, Katibu Tawala wa Singida, Naima Chondo na Mkurugenzi wa Halmashauri ya Ikungi, Justin Kijazi.

Hii ni katika maonesho ya Nanenane ya mwaka 2024 ambayo kitaifa yanafanyika katika Viwanja vya Nzuguni, Dodoma.

Wakati wa ziara hiyo, Pinda alitembelea mabanda ya Halmashauri zote saba, ikiwemo Manispaa, ambapo alipata nafasi ya kujionea shughuli za wajasiriamali. Aliweza kuona bidhaa mbalimbali kama vile asali, mafuta ya alizeti, unga wa lishe, na kutoa ushauri wa kuboresha ubora wa bidhaa hizo baadhi.

Aidha, Pinda alipata fursa ya kutembelea mabanda ya mifugo, ikiwa ni pamoja na ng'ombe, mbuzi, mabata, kuku, na ufugaji wa samaki, ambapo alishiriki katika majadiliano kuhusu maendeleo ya sekta hiyo. Alisisitiza umuhimu wa kuboresha bidhaa za mifugo na kuongeza ubora wa uzalishaji.