WIKI YA MAADHIMISHO YA MIAKA 61 YA UHURU YAENDELEA KWA SHUGHULI ZA USAFI KATIKA MANISPAA YA SINGIDAGIDA

Posted on: December 6th, 2022

Wakazi wa Manispaa ya Singida leo tarehe 6 Desemba 2022 wameendelea na wiki ya  maadhimisho ya miaka 61 ya uhuru wa Tanganyika kwa  kufanya usafi katika maeneo mbalimbali ya Manispaa ya Singida

Akiongoza zoezi la Usafi, Mkuu wa wilaya ya Singida Mhandisi Paskasi Mulagiri,  akiwa pamoja na watumishi  na wananchi wa Manispaa ya Singida, amewataka wananchi kujenga tabia ya kufanya usafi wao wenyewe bila kusuribiri matukio muhimu.

Mulagiri amesema maagizo aliyotoa yanalengo moja la kuuweka mji katika hali ya usafi  kama ambavyo wananchi wake walivyo na utamaduni wa usafi hali itakayoiweka Singida kuwa  miongoni mwa mikoa/ wilaya zinazoongoza kwa usafi hapa nchini.

Amesema eneo lolote la biashara ama makazi litakalokutwa chafu mhusika wa eneo atatozwa faini  kuanzia Sh. 50,000 hadi 300,000 hivyo kuwataka wananchi wote kuzingatia hilo ili kuepuka faini hizo.

“faini itatozwa kwa yeyote atakayekutwa ameacha eneo lake chafu Iwe ni sehemu ya biashara ama makazi kuanzia sh. 50,000 hadi 300,000 kutegemeana na wingi wa uchafu uliachwa mbele ya eneo lako” amesisitiza Mkuu wa Wilaya

Aidha Mhandisi Mulagiri ametoa rai kwa wananchi kuwakamata wale wote watakaokutwa wakichafua mazingira kwa kutupa taka ovyo ama kujisadia  maeneo ambayo yasiyo rasmi kuwakamata na kuwatoza faini isiyopungua Sh. 50,000 na kusema kuwa yeyote atakayemkamata mchafuzi wa mazingira kupewa motisha ya Sh. 10,000 papo hapo

Pamoja na hayo, Mkuu huyo wa wilaya ametoa pongezi kwa Rais wa Jamhuri ya Muungano wa Tanzania  Dkt. Samia Suluhu Hassani kwa kuagiza  fedha Zaidi ya Sh. Milioni 900 zilizokuwa zitumike katika maadhimisho ya Siku ya Uhuru tarehe 9 Desemba kutumika katika mradi wa ujenzi wa mabweni katika shule 8 za wanafunzi wenye mahitaji maalum.

Naye Naibu Meya wa Manispaa ya Singida Hassan Mkata, amemtaka Mkurugenzi kuhakikisha anasimamia vyema maagizo yaliyotolewa na Mkuu wa wilaya Mhandisi Mulagiri huku akiwataka wananchi na hasa wafanyabiashara kuhakikisha wanatekeleza maagizo yaliyotolewa.

“……isije ikafika mahali mkatozwa faini mkaanza kulalamika mnaonewa na serikali, nawaomba sana tuzingatie taratibu, sheria na kanuni tulizojiwekea wenyewe za mwaka 2019 kuhusu usafi wa mazingira” amesema Mkata

Aidha Naibu Meya ameupongeza uongozi wa soko kwa uhamasishaji wa zoezi la usafi hali iliyofanya watu kujitokeza kufanya usafi eneo la soko kuu Kata ya Ipembe

Zoezi hili la usafi ni  moja ya njia ya kumuunga mkono Rais wa Jamuhuri ya Muungano wa Tanzania  Dkt. Samia Suluhu Hassani katika kudumisha Amani na umoja kwa maendeleo ya nchi yetu kama ambavyo kauli mbiu ya ya Maadhimisho ya siku ya Uhuru wa Tanganyika inavyohimiza “ Amani na Umoja, nguzo ya Maendeleo yetu”