WILAYA YA SINGIDA YAJIZATITI UFUNDISHAJI KWA NJIA YA TEHAMA

Posted on: February 11th, 2024

Serikali wilaya ya  Singida imezitaka shule zote za Msingi na Sekondari kuchukua hatua katika ufundishaji kwa njia ya TEHAMA kwa masomo yenye upungufu wa walimu ikiwa ni moja ya mikakati ya kuinua kiwango cha elimu wilayani humo.

MKuu wa wilaya ya Singida Mhandisi Paskasi Muragili ametoa agizo hilo katika kikao kazi cha kupokea taarifa ya hali ya ufundishaji kwa njia ya TEHAMA katika Halmashauri mbili za wilaya Singida ambazo ni Manispaa ya Singida na Halmashauri ya wilaya ya Singida.

Muragili amesema idadi ya shule ambazo zimeanza utekelezaji tangu kutolewa kwa maelekezo ya kufundisha kwa njia ya TEHAMA Oktoba 4, 2023 hairidhishi hivyo kutoa agizo kwa wakurugenzi kuhakikisha kila halmashauri inanunua vifaa vya TEHAMA kwa ajili ya kufundishia wakati kila shule ikijipanga kununua vifaa vyake.

“… wakurugenzi nunueni vifaa hivyo ambavyo kwa sasa vitakuwa vikizunguka kwa kila shule wakati shule zikijipanga kupata vifaa vyao…. Shirikisheni wazazi kupitia vikao na mikutano na wafadhili ili kufanikisha upatikanaji wa vifaa”, amesisitiza.

Jumla ya shule za sekondari 08 na za msingi 13 zimeanza kutekeleza ufundishaji kwa njia ya TEHAMA katika wilaya ya Singida ikiwa shule 6 za sekondari ni za Manispaa ya Singida na 02 kutoka Halmashauri ya wilaya ya Singida. Kwa upande wa shule za msingi Jumla ya shule 11 za Manispaa ya Singida zinafundisha kwa njia ya TEHAMA na shule 02 ni kutoka Halmashauri ya wilaya ya Singida.

Wakiwasilisha taarifa ya utekelezaji wa agizo hilo lililotolewa mwezi Oktoba 4, 2023 na Mkuu huyo wa wilaya, Maafisa elimu wa Divisheni za elimu Sekondari na Msingi wameeleza changamoto kubwa iliyowakwamisha na kusababisha kusuasua kwa utekelezaji wa agizo hilo ni ukosefu wa vifaa vya TEHAMA

Aidha tayari Idara hizo zimeshaainisha masomo ambayo yanachangamoto ikiwa ni masomo ya hesabu, sayansi na kiingereza kwa shule za msingi wakati kwa shule za sekondari masomo yaliyobainishwa ni kemia, fizikia, baolojia, hesabu na kiingereza.

Pamoja na ubainishaji huo tayari timu za uratibu wa masuala ya ufundishaji kwa njia ya TEHAMA zimeundwa sambamba na kubaini walimu mahiri katika masomo yaliyobainishwa ili kuweza kufanikisha ufundishaji huo.

Akitoa mchango wake Naibu Meya wa Manispaa ya Singida Geophrey Mdama ameunga mkono agizo hilo na kusema ni wakati sasa wa kuamka na kutekeleza kwa vitendo kwani inawezekana kupitia njia shirikishi jamii.

Aidha Mwenyekiti wa Halmashauri ya wilaya ya Singida Elia Diga amesema agizo limepokelewa na linakwenda kutekelezwa kwa ushirikiano baina ya wataalam, wazazi na wanasiasa kwa maana ya madiwani.

 “Miaka ya 1980 iliwezekana wanafunzi walisoma kupitia redio dararasani kwani sasa tushindwe?” alisisitiza Diga.

Shule zote zimeelekezwa kwenda kuweka mkakati Madhubuti wa kuhakikisha zoezi hilo linatekelezeka kwa mafanikio makubwa.

Wilaya ya Singida ilianza kufufundisha kwa njia ya TEHAMA mapema mwezi Oktoba 2023 kufuatia agizo la Mkuu wa wilaya hiyo Mhandisi Paskasi Muragili ikiwa ni moja ya mikakati ya kuinua kiwango cha elimu wilayani humo.