WIZARA YA AFYA YAPONGEZA MANISPAA YA SINGIDA KWA USIMAMIZI BORA WA HUDUMA ZA AFYA

Posted on: February 6th, 2025

Mkurugenzi Msaidizi wa Huduma za Kinywa na Meno wa Wizara ya Afya, Dkt. Baraka Nzobo, ameipongeza Manispaa ya Singida kwa kazi nzuri inayofanywa katika utoaji wa huduma za afya, akisisitiza kuwa ni muhimu kuendelea kusimamia vyema ukusanyaji wa mapato na kuhakikisha huduma bora kwa wananchi.

Dkt. Nzobo aliongoza timu ya wataalam kutoka Wizara ya Afya katika ziara ya usimamizi shirikishi wa miradi na huduma za afya kwenye Hospitali ya Halmashauri ya Manispaa ya Singida na Kituo cha Afya Sokoine, ambapo timu hiyo ilikagua maeneo mbalimbali yanayotolewa huduma.

 Ziara hiyo ilifanyika , Februari 6, 2025, ikiwa ni sehemu ya juhudi za Wizara ya Afya kuhakikisha miradi ya huduma za afya inatekelezwa kwa ufanisi katika vituo vya kutolea huduma za afya.

Timu ya Wizara ya Afya ilikagua maeneo kama vile huduma za wagonjwa wa nje (OPD), huduma kwa mama na mtoto, magonjwa yasiyoambukiza, lishe, huduma za dawa, huduma za utengamavu kwa wazee, ustawi wa jamii, na huduma kwa wateja.

Baada ya ukaguzi, Dkt. Nzobo alitoa pongezi kwa Manispaa ya Singida kwa mafanikio yaliyopatikana, lakini alisisitiza kwamba bado kuna mapungufu machache yanayohitaji kuzingatiwa. Aliwataka watumishi wa hospitali na vituo vya afya kuongeza juhudi katika usimamizi wa mapato, akisema kuwa ukusanyaji wa mapato ni muhimu kwa kuboresha mazingira ya huduma za afya na kuhakikisha hospitali inajitegemea kifedha.

“Ni muhimu kusimamia mapato vizuri, kwani yataisaidia hospitali katika kuendesha huduma na kuboresha mazingira ya hapa. Ikiwa mapato yataendelea kubaki hapa, itakuwa msaada kwa hospitali na watumishi kwa kulipwa stahiki zao bila kutegemea fedha kutoka maeneo mengine,” alisema Dkt. Nzobo.

Aidha, alisisitiza umuhimu wa kupunguza rufaa zisizo za lazima kutoka hospitali ya Manispaa ya Singida kwenda hospitali za mkoa. “Tunategemea hospitali ya wilaya kuwa na uwezo wa kutoa huduma bora na kumaliza kesi nyingi za wagonjwa hapa, na siyo kuzituma kwenye mikoa mingine,” alisema.

Kuhusu upungufu wa watumishi, Dkt. Nzobo alishauri kuwa Manispaa ya Singida iendelee kufanya juhudi za kuomba vibali kwa ajili ya kuajiri watumishi wa afya ili kuboresha huduma zinazotolewa kwa wananchi.

Ziara hii ni sehemu ya juhudi za Wizara ya Afya za kuhakikisha ufanisi wa huduma za afya katika hospitali za wilaya na vituo vya afya nchini.