ZIARA YA MAFUNZO KWA WAHESHIMIWA MADIWANI NA WATAALAMU MANISPAA YA SINGIDA YALETA CHACHU YA MAENDELEO

Posted on: November 1st, 2022

HALMASHAURI ya Manispaa ya Singida, imefanya ziara ya mafunzo katika Jiji la Mwanza na   mkoa wa Shinyanga, ili kujifunza utekelezaji na usimamizi wa miradi ya Mandeleo, kupitia mapato ya ndani, kwa lengo la kuongeza mapato yatakayochangia utekelezaji wa miradi mbalimbali.

Ziara hiyo ya siku nane kwa mikoa hiyo miwili, ilihusisha Wakuu wa Idara na waheshimiwa madiwani wa Halmashauri ya Manispaa ya Singida, ikiwa ni azimio la vikao, likiwemo Baraza la Madiwani, kwa ajili ya kujifunza kupitia halmashauri zilizofanikiwa katika ukusanyaji wa mapato, usimamizi wa usafi na mazingira pamoja na utekelezaji wa miradi ya maendeleo kupitia mapato ya ndani ya Halmashauri.

Wakiwa Jijini la Mwanza, katika halmashauri ya Manispaa ya Ilemela, Madiwani na Wakuu wa Idara wakiongozwa na Naibu Meya wa Manispaa ya Singida, Hassan Mkata, walitembelea Mradi wa Ujenzi wa Ofisi mpya wa jengo la Utawala na maendeleo ya ujenzi wa kituo kikuu cha mabasi yaendayo mikoani, cha Ilemela.

“Tumelazimika kufanya ziara hii ya mafunzo kwa nia njema kabisa ya kufahamu, nini ninyi wenzetu mnafanya katika kusimamia miradi yenu, na kitu gani tunapaswa kwenda kukifanya tukisharudi nyumbani kwa ajili ya maendeleo ya jamii yetu…,” alisema Naibu Meya wa Manispaa ya Singida.

Aidha Naibu Meya huyo, aliushukuru uongozi wa Jiji la Mwanza kwa mapokezi makubwa, na akapongeza juhudi za Jiji hilo katika kubuni na kutekeleza miradi ya maendeleo, ikiwemo pia kuimarisha ukusanyaji wa mapato yake ya ndani.

Katika ziara hiyo, maeneo mengine yaliyotembelewa na msafara huo ni, dampo la kisasa lililopo eneo la Buhongwa ambalo ujenzi wake unatekelezwa na Halmashauri ya Jiji, na pia kujionea maendeleo ya ujenzi wa soko ( Mwanza Central Market) eneo la Pamba Road linaloelezwa kuwa mkombozi kwa wananchi wa Jiji hilo pindi litakapokamilika.

Msafara huo ukiwa Mkoani Shinyanga, ulipata fursa ya kutembelea Hospitali ya Halmashauri ya Manispaa ya Kahama iliyokamilika na kugharimu zaidi ya Shilingi Bilioni 1.6.

Akiwa Kahama, Mkuu wa Wilaya ya Singida, Mhandisi Paskasi Muragili, aliipongeza Manispaa hiyo kwa maboresho makubwa,  pia ushirikiano uliopo kati ya wataalamu na madiwani, hali inayochangia kukua kwa kasi kwa Manispaa hiyo.

“Kwa kweli lazima niwapongeze kwa kazi nzuri, hapa naona mmeitendea haki kabisa Serikali yenu…sisi Manispaa ya Singida tumejifunza kitu, ili tukirudi, yote mazuri tuliyoyaona kwenu, basi tukayatumie kwa ajili ya manufaa ya watu wetu,”alisema Mkuu huyo wa Wilaya.

Naye Kaimu Mkurugenzi  wa Halmashauri ya Manispaa ya Kahama, Clemence Mkusa, alisema mafanikio hayo yametokana na ushirikiano baina yao, hali iliyowezesha kuongezeka kwa mapato ya ndani, ambayo yanachangia kutekelezwa kwa miradi ya maendeleo, ikiwemo ujenzi wa hospitali ya Wilaya inayogharimu zaidi ya Shilingi Bilioni 1.6 hadi itakapokamilika.   

Aidha kwa upande wa jingo la ofsi za Manispaa ya Kahama Kaimu Mkurugenzi huyo amesema Mpaka kukamilika Halmashauri imetumia kiasi cha Shilingi 1,663,010,316.28 ikiwa kazi za ujenzi wa jengo, ujenzi wa fensi, ujenzi wa kibanda cha Mlinzi, ujenzi wa meneo ya maegesho ya magari na maeneo ya nje, ununuzi wa samani za ofisi na ufungaji wa  miundombinu ya TEHAMA ikiwa ni pamoja na ufungaji wa Mfumo wa kukusanyia mapato zote zikiwa ni fedha za makusanyo ya ndani.

Waheshimiwa Madiwani na wataalamu wa Manispaa ya Singida wakisikiliza taarifa ya Halmashauri ya Manispaa ya Kahama mkoa wa shinyanga

Diwani wa Viti Maalumu Manispaa ya Singida Mhe. Margreth Malecela akiuliza swali  wakati wa ziara ya mafunzo katika Halmashauri ya Manispaa ya Ilemela.

Naibu Meya, Mhe. Hassan Mkata ( Katikati) wakipatiwa maelezo ya miradi inayotekelezwa katika Jiji la Mwanza. Kushoto ni Mchumi wa Manispaa ya Singida Jeremiah Kikonge na Kulia ni Mhe. Shabani Magwe Diwani wa Kata ya Unyambwa na Mhe. Munjori Kawawa Diwani wa Kata ya Utemini