DC SINGIDA ATAHADHARIDHA MMOMONYOKO WA MAADILI

Posted on: March 2nd, 2022

Mkuu wa wilaya ya Singida Mhandisi Paskasi Muragili amewaomba waheshimiwa madiwani wa Halmashauri ya Manispaa ya Singida kushirikiana na Viongozi katika kata na mitaa katika kuelimisha masuala ya uadilifu na kuwalinda Watoto dhidi ya changamoto za mmomonyoko wa maadali katika Manispaa ya singida.

Mhandisi Muragili aliyasema hayo katika mkutano wa baraza la madiwani  wa robo ya pili kwa Mwaka wa fedha 2021/2022  lililofanyika katika ukumbi wa Mwenge Sekondari, na kusema vitendo vya utovu wa maadilli ni muhimu vidhibitiwe kwani wanaoumia ni Watoto wetu.

“nimepokea taarifa ya vitendo viovu vya kuwalawiti Watoto wetu wa kiume, kama mzazi nimeumia sana. Nawaomba waheshimiwa mshirikiane na Viongozi katika kata kutoa elimu kwa Jamii na kuwalinda Watoto hawa”, alisema.

Aidha aliendelea kusema sambamba na vitendo hivyo viovu , Manispaa ya Singida kwa sasa imekuwa na wimbi kubwa la Watoto wanaoishi mitaani na kulala katika baraza za maduka , hivyo kuitaka idara ya ustawi wa Jamii kuwabaini na kwa kushirikiana na uongozi wa kata watafutwe wazazi au ndugu wa Watoto hao waweze kurudi nyumbani na kulelewa na familia

“waheshimiwa Watoto hawa wanajulikana makwao, idara ya ustawi wa Jamii itusaidie kuwabaini  na kwa kushirikiana na uongozi wa kata Waheshimiwa mkiwemo warudishwe kwa wazazi wao”, alisisitiza Mkuu wa Wilaya.

Akifunga Mkutano wa Baraza la Madiwani Mstahiki Meya wa Manispaa ya Singida Mhe. Yagi Kiaratu alisema ni wakati sasa wa kuondokana na dhana ya kuwa mtoto ni wa mzazi mmoja bali ieleweke mtoto sio wa mzazi mmoja bali wa taifa hivyo ni jukumu la Jamii nzima kumlinda ili aweze kufikia ndoto zake.

Aliwataka waheshimiwa madiwani kushirikiana na uongozi wa kata na mitaa kuhakikisha wale waliofaulu kwenda sekondari  Mwaka 2022 wana ripoti shule na taarifa zao zitolewa ili iwe rahisi kufanya ufuatiliaji kwa wale ambao hawajaripoti shule.

Aidha Mhe. Yagi alimwagiza Mkurugenzi kupitia kwa Afisa elimu sekondari kuandaa taarifa ya wanafunzi walioripoti  na wale ambao hawajaripo na kuiwasilisha ili kuweka mkakati wa kuwabaini wale ambao hawajaripoti.