Dkt. Dugange Atoa Wito kwa Wananchi Kujitokeza Kupiga Kura Uchaguzi wa Serikali za Mitaa

Posted on: August 4th, 2024

Dkt. Dugange Atoa Wito kwa Wananchi Kujitokeza Kupiga Kura Uchaguzi wa Serikali za Mitaa

Naibu Waziri wa Ofisi ya Rais TAMISEMI, Dkt. Festo Dugange, amewahimiza wananchi kujitokeza kwa wingi kushiriki katika uchaguzi wa viongozi wa Serikali za Mitaa un. Dkt. Dugange alisisitiza kuwa viongozi hawa ni nguzo muhimu katika kufanikisha malengo ya maendeleo ya Serikali, kwani wanamsaidia Rais wa Jamhuri ya Muungano wa Tanzania katika utekelezaji wa mipango ya maendeleo kwenye maeneo yao.

Akizungumza leo Agosti 4, 2024 katika banda la Ofisi ya Rais TAMISEMI kwenye Maonesho ya Wakulima na Wafugaji (Nanenane) yanayoendelea Viwanja vya Nzuguni, Dodoma, Dkt. Dugange alisema, "Uchaguzi wa Serikali za Mitaa ni fursa muhimu kwa wananchi kuchagua viongozi bora watakaosaidia katika utekelezaji wa miradi mbalimbali ya maendeleo. Hawa ndio wanaokutana na changamoto za wananchi moja kwa moja, hivyo ni muhimu kuwachagua viongozi wenye uwezo na uadilifu."

Dkt. Dugange aliongeza kuwa, kwa lengo la kuwajengea uwezo viongozi watakaochaguliwa, viongozi wa Mamlaka za Serikali za Mitaa wanapaswa kutumia Chuo cha Serikali za Mitaa kwa ajili ya kutoa mafunzo. "Ni muhimu kuhakikisha kuwa viongozi wetu wanapata mafunzo ya kutosha ili waweze kutimiza majukumu yao ipasavyo. Hii itawawezesha kutatua changamoto za wananchi na kusaidia kuleta maendeleo ya haraka na endelevu," alieleza Dkt. Dugange.

Kauli hiyo imekuja wakati wa maonesho ya Nanenane ambayo ni sehemu muhimu ya kalenda ya kilimo na maonyesho hayo yakienda na kauli mbiu ya "Chagua Viongozi Bora wa Serikali za Mitaa kwa Maendeleo Endelevu ya Mifugo na Uvuvi".

Wananchi wamehimizwa kujitokeza kwa wingi na kushiriki katika uchaguzi huo kwa kuwa ni haki yao ya kikatiba na njia muhimu ya kushiriki katika uongozi na uendeshaji wa Serikali.