HALMASHAURI KUU YA CHAMA YAFURAHISHWA NA UTEKELEZAJI WA ILANI KATIKA MANISPAA YA SINGIDA

Posted on: July 14th, 2023

Wajumbe wa Halmashauri kuu ya Chama cha Mapinduzi (CCM) Wilaya ya Singida Mjini wameeleza kuridhishwa na kufurahishwa na utekelezaji mzuri wa ilani ya Uchaguzi ya mwaka 2020/2025 katika Manispaa ya Singida.

Hayo yameelezwa katika Kikao cha Halmashauri Kuu ya CCM wilaya ya Singida Mjini jana tarehe 13 Julai, 2023 kilichofanyika katika ukumbi wa Chuo cha Maendeleo ya Wananchi (FDC) mjini Singida.

Akiwasilisha taarifa ya utekelezaji wa Ilani ya Uchaguzi, Mkuu wa Wilaya ya Singida, Mhandisi Paskasi Muragili amesema, Manispaa ya Singida kupitia Idara zake zote na Vitengo, imeweza kutekeleza Ilani ya Uchaguzi kwa kipindi cha Januari- Juni  2023 kwa ufanisi huku akiitaja Miradi ya maendeleo kutekelezwa kwa kiwango chenye ubora na kukamilika kwa  wakati.

Aliitaja miradi hiyo kuwa ni ujenzi wa vyumba vya madarasa ya shule za msingi, ujenzi wa shule mpya 02 kupitia mradi wa BOOST , ujenzi na ukamilishaji wa vyumba vya madarasa pamoja na vyoo na ujenzi wa jengo jipya la Utawala la Manispaa ya Singida kwa fedha za serikali kuu. Uwezeshaji wa wananchi kupitia TASAF ni moja ya miradi iliyowasilishwa.

Miradi mingine ni pamoja na  ujenzi wa kituo kipya cha afya Mtipa, Ujenzi wa machinjio mapya, ununuzi wa malori 02 ya ubebaji taka, ununuzi wa kifaa cha kisasa cha upimaji ardhi yote ikitekelezwa kupitia fedha za  Mapato ya ndani.

Mhandisi Muragili aliitaja miradi ya taasisi za serikali kuwa ni pamoja na mradi wa mabwawa ya maji taka unaotekelezwa na Mamlaka ya maji safi na usafi wa Mazingira Singida (SUWASA), Mradi wa Umeme vijijini (REA),  na Uboreshaji wa miundombinu ya barabara (TARURA).

Mwenyekiti wa CCM wilaya ya Singida Mjini, Bi. Lucia Mwiru, amepongeza utekelezaji wa Ilani katika Manispaa na kusema yote yamewezekana kutokana na ushirikiano mkubwa uliopo kati ya Serikali na Chama.

Mwenyekiti huyo ametoa msisitizo katika suala la usafi na mazingira lakini pia kwa idara ya Ardhi kuongeza bidii katika kuhakikisha wanaondoa kero zinazowakabili wananchi.

Mwenyekiti Mwiru amehimiza ushirikiano wa vingozi wa chama na serikali katika ngazi zote na kusema kwa njia hii, uwazi utakuwepo na hivyo kuondoa dhana zisizo sahihi hasa katika utekelezaji wa miradi.

Mwiru ameagiza watendaji wa Kata na mitaa kutoa taarifa za utekelezaji wa ilani kwa wananchi kwa kuwashirikisha viongozi wa chama ngazi ya kata na matawi.

Mstahiki Meya wa Manispaa ya Singida, Yagi Maulid Kiaratu, amewataka wataalamu katika ngazi zote kutumia matokeo ya sensa ili kufanya mtawanyo wa rasilimali kwa usahihi na kuhakikisha wananchi wananufaika nazo.

Meya Kiaratu amewataka Madiwani kuondoa matakwa binafsi na kuzingatia matokeo ya sensa 2022 katika kutetea Kata zao ili  kunufaisha wananchi wao .

Mstahiki Meya ametumia fursa hiyo pia kuwataka watendaji wa Kata, Vijiji na Mitaa kuweka kumbukumbu sahihi za maeneo ambayo yalitolewa na jamii ama watu binafsi kwa ajili ya taasisi kwa maendeleo ya wananchi ili kuepuka migogoro inayoweza kutokea hapo baadae.

Naye Mbunge wa Singida Mjini, Mussa Sima, pamoja na kupongeza utekelezaji mzuri wa Ilani ya Uchaguzi, ameziomba taasisi za serikali kuandaa semina kwa ajili ya wajumbe wa halmashauri kuu ya chama ili waweze kuwa na uelewa mpana wa miradi wanayoitekeleza ili waweze kuisemea vyema kwa wananchi.

Aidha Mhe. Sima, amechukuwa fursa hiyo kuwaelimisha wajumbe wa Halmashauri Kuu ya CCM wilaya juu mijadala inayoendelea kuhusu Mkataba wa Bandari ili kuwawezesha kuelewa kuhusu maamuzi yaliyofikiwa na serikali na hivyo kupeleka elimu hiyo kwa wananchi.