KAMATI TENDAJI BARAZA LA BIASHARA WILAYA YA SINGIDA YAJENGEWA UWEZO

Posted on: August 16th, 2022

Kamati Tendaji ya Baraza la Biashara la Wilaya ya Singida leo tarehe 16/08/2022 imejengewa uwezo ili kuweza kuendesha na kusimamia mabaraza ya biashara kwa tija na ufanisi na kuleta mabadiliko chanya katika utendaji kazi wa Baraza la wilaya.

Akifungua kikao hicho cha Kamati Tendaji ya Baraza la Biashara la Wilaya Kaimu Mkurugenzi wa Manispaa ya Singida Ndg. Kulanga Matia Kanyanga amewataka wajumbe wa kikao hicho kuwa wasikivu na kuchukua mafunzo hayo kama chachu ya kuleta mabadiliko katika sekta ya biashara katika wilaya ya Singida.

“Niwasihi muwe wasikivu na mchukue mafunzo haya kama chachu ili kuleta mabadiliko ya kibiashara katika wilaya yetu …” amesema Kulanga

Akielezea lengo la mafunzo hayo Mratibu kutoka shirika la Maendeleo la Ujerumani (GIZ) Bw. Andrew Mhina amesema lengo ni kuimarisha mabara hayo na kuyapa nguvu ya kuweza kusimamia masuala ya uchumi, biashara, na kuendeleza sekta binafsi katika biashara.

Amesema uwezo unalengwa kujengwa kwa wajumbe wa Kamati Tendaji hiyo pamoja kuwawezesha kuandaa agenda shirikishi, uibuaji wa ajenda kwa ajili ya majadiliano na kuandaa mpango kwa ajili ya Kufuatilia maazimio yaliyotokana na majadiliano.

“baada ya mafunzo haya washiriki ambao ni wajumbe wa kati tendaji ya baraza la biashara la wilaya watakuwa na uwezo wa kuandaa ajenda, kuibua ajenda kwa ajili ya majadiliano na kuwa na mpango Madhubuti wa ufuatiliaji”, alisema Mhina.

Akiwasilisha mada kuhusiana na Mazingira ya biashara Mkufunzi wa mafunzo hayo Ndg. Swabiri Khalid kutoka IMED Consultant amesema uwepo wa Mazingira ya biashara yasiyorafiki huathiri mzunguko mzima wa biashara na hivyo kuathiri Mfumo mzima wa ukusanyaji mapato ya Halmashauri.

Amesema ni jukumu la Baraza la Biashara la Wilaya kuhakikisha panakuwepo na sheria rafiki kwa wawekezaji na wafanyabiasha kwa ujumla, Miundombinu wezeshi na ushiriki wa wananchi katika kutoa maoni ili kutengeneza sekta binafsi imara zitakazochangia katika ongezeko la mapato ya Halmashauri.

“Uwepo wa sheria rafiki kwa wawekeshaji kutachangia katika kuboresha upatikanaji wa mapato ya ndani katika Halmashauri zetu” amesema.