MANUFAA YA MAFUNZO YA KILIMO CHA KISASA CHA MBOGA NA MATUNDA YAANZA KUONEKANA KWA VIJANA -MANISPAA YA SINGIDA.

Posted on: June 3rd, 2022

Kundi la Vijana 100 walipatiwa mafunzo ya kilimo cha mbogamboga na matunda katika Halmashauri ya Manispaa ya Singida wameanza kunufaika na mafunzo hayo.

Mmoja kati ya Vijana sita wanaosimamia mazao yaliyopandwa katika shamba darasa hilo Emmaculatha Nkumbi amesema mazao wanayoendelea kuvuna na kuuza ambayo ni nyanya na mboga za majani ni matokeo ya mafunzo waliyopata kupitia Ofisi ya Wazairi Mkuu na kufundishwa na wakufunzi kutoka chuo kikuu cha kilimo cha Sokoine (SUA)

Amesema kutokanana na mafunzo hayo Vijana wengi na hasa wa kike wataondokana na utegemezi kwa wazazi kwa kuwa sasa wanauwezo wa kitaalam wa kuzalisha mazao na kuuza kwa faida.

“mboga na nyanya tunazolima ni bora kwa kuwa tunalima kitaalam hivyo kutuongezea kipato alisema Emmaculatha.

Amewaasa vijana kuiga mfano wao kwa kujiunga katika vikundi na kufika katika Manispaa ya Singida tayari kwa kupatiwa mafunzo ambayo ni endelevu na kuongeza kuwa kamwe hawatajutia uamuzi watakaoufanya.

Amesema kilimo hiki cha kisasa kinaweza kufanyika hata katika eneo dogo na matokeo makubwa yakaonekana kutokana na ubora wa mazao yatakayozalishwa hali ambayo inatofautisha mazao yanayolimwa kisasa na yale yanayolimwa kienyeji na hivyo kupata kipato kikubwa.

Akizungumzia soko la mazao ya mbogamboga na nyanya walizolima vijana hao, Msimamizi wa mafunzo na shamba darasa la mbogamboga kupitia kitalu nyumba Ndg. Simon Magige amesema, mboga na nyanya walizolima vijana hao zinajitofautisha na zilizopo sokoni kutokana na ubora wake.

Amesema lengo la mafunzo ni kuwawezesha kuzalisha bidhaa yenye ubora na ndilo lengo kuu la Serikali la kuwa na bidhaa sokoni zenye ubora kwa mlaji/ mtumiaji.

“Sasa hivi soko limejaa nyanya na mbogamboga lakini wachuuzi wamekuwa wakimiminika kununua mboga na nyanya zilizolimwa na vijana hawa kwa kuwa ni nzuri na zina ubora wa hali ya juu” alisisitiza Magige

Magige ameendelea kusema tangu kumalizika kwa mafunzo jumla ya Vijana 21 wameweza kuanzisha bustani za kisasa za nyanya na mbogamboga na kati ya hao vijana 6 wako katika kikundi na Vijana 15 ni mmoja mmoja

Kwa sasa Vijana hao wameanza kuvuna nyanya ambazo wanatarajia kuvuna kiasi cha tani 7 za nyanya.