MAZIWA KINDAI NA SINGIDANI KATIKA MANISPAA YA SINGIDA KUINUA MAPATO KUPITIA UVUVI

Posted on: February 19th, 2022

Halmashauri ya Manispaa ya Singida kwa kipindi cha Januri hadi mei,2022 imeweka utaratibu wa kusitisha shughuli za uvuvi ili kuruhusu Samaki kuzaliana na kulinda Mazingira ya majini.

Hayo yameelezwa leo tarehe 18 February, 2022 na Kaimu Mkurugenzi wa Manispaa ya Singida Ndg. Jeshi Lupembe  ambaye alisema pindi maziwa hayo mawili Kindai na  Singidani yatakapofunguliwa  Manispaa inatarajia kuvua kiasi cha tani 35 za Samaki zenye thamani ya Tshs. Milioni 280.

Alisema kwa tani hizo 35 sio tu Manispaa itakayokuwa imenufaika kwa kuongezeka kwa makusanyo ya mapato ya ndani bali pia wavuvi na wananchi wa kawaida kwa kukuza uchumi wao na kujipatia lishe kutokana na Samaki bora watakaopatikana.

Aliendelea kufafanua kuwa katika kipindi hiki ambacho uvuvi umesitishwa Manispaa kupitia wananchi na viongozi wa vijiji na mitaa inayozunguka maziwa hayo, wanaendelea kuhakikisha fukwe zinakuwa safi na kulinda Mazingira yake dhidi ya matumizi mabaya hasa ya uchugaji holela kando kando ya maziwa hayo.

Kaimu Mkurugenzi ameendelea kufafanua kuwa tayari Ofisi yake kupitia Idara ya Mifugo na Uvuvi imeshafanya mawasiliano na Mamlaka ya Bonde la kati ili kupatiwa boti ya doria kwa ajili ya kudhibiti uvuvi  haramu na kwamba katika hatua ya awali Manispaa inatumia migambo kwa ajili ya ulinzi.

Naye Mkuu wa Idara ya Mifugo na Uvuvi Dr. Adrianus Kalekezi alisema, lengo la kufunga maziwa hayo sio kuwanyima fursa wavuvi bali kuwatengenezea mazingira ya kufanya shughuli za uvuvi zenye tija kwa kupata Samaki wakubwa ambao pia thamani yake ni kubwa.

 Alisema kwa sasa Manispaa imeunda kikosi kazi kwa ajili ya kuwadhibiti wavuvi wanaokaidi agizo la kutovua kwa kipindi hiki ambacho kinahusisha polisi, mgambo na wataalamu wa Idara.

Amewaasa wavuvi kutumika kipindi hiki kwa kujiandaa kukata leseni, kununua zana bora za uvuvi hasa nyavu zinazokubalika kwa shughuli za uvuvi , mavazi ya kujiokoa na ajali za majini ( life jackets) pia kujiunga na umoja wa wavuvi ili kuweza kutambulika na kufikika kirahisi .

Dr. Kalekezi pia alisema kwa sasa Idara yake imeainisha mialo 02 tu ikiwa ni moja ya mkakati wa kudhibiti  mianya ya kupoteza mapato lakini pia kudhibi wavuvi wanaotumia nyenzo haramu ( makokora) wanaopolekea kuharibu mazalia ya Samaki pembezoni mwa maziwa.

“Mialo hii 02 inadhibiti ukwepeshaji wa mapato pia uvuvi haramu unaomaliza samaki wakubwa ambao wanatarajiwa kutaga pembezoni mwa ziwa katika kipindi hiki ” alifafanua Dr. Kalekezi

Halmashauri ya Manispaa ya Singida ina jumla ya wavuvi 150 wanaotambulika na waliojisajili katika umoja wao ambapo mitumbwi ipatayo 42 hutumika kwa ajili ya shughuli za uvuvi katika maziwa Kindai na Singidani ambayo ni maziwa makubwa katika Manispaa ya Singida.

Aidha katika kipindi cha Julai  hadi Desemba 2021, wavuvi 22 wameweza kukata leseni ambapo kiasi cha fedha Tshs. 550,000 zimeweza kukusanywa. Zoezi la kuhamasisha  wavuvi kukata leseni linaendelea hasa katika kipindi hichi ambapo shughuli za uvuvi zimesitishwa.

Kaimu Mkurugenzi wa Manispaa ya Singida Ndg. Jeshi Lupembe