MEYA MANISPAA ATOA TAHADHARI UKUSANYAJI WA MAPATO NA HALI YA CHAKULA

Posted on: March 4th, 2025

Wakati akihitimisha Mkutano wa Pili wa Baraza la Madiwani la Robo ya Pili, Mstahiki Meya wa Manispaa ya Singida, Mhe. Yagi Kiaratu, amesisitiza umuhimu wa kuongeza juhudi katika ukusanyaji wa mapato ili kufikia malengo yaliyowekwa kwenye bajeti.

Akizungumza katika mkutano uliofanyika leo, Machi 4, 2025 katika Ukumbi wa Maktaba ya Mwenge Sekondari, Manispaa ya Singida, Mhe. Yagi alisisitiza kwamba lengo la ukusanyaji wa mapato kwa asilimia 100 linapaswa kutekelezwa ili kufikia malengo yaliyowekwa katika bajeti ya mwaka huu.

Alieleza kuwa hali ya ukusanyaji wa mapato imekuwa ikizorota kwa baadhi ya maeneo, lakini aliwahimiza wataalam kuendelea kufanya kazi kwa bidii na kuhakikisha kuwa malengo ya asilimia 100 yanatimia.

"Tumezoea kukusanya mapato kwa asilimia 100 na sio asilimia 80, na hili ni lengo letu kuu kama tulivyokubaliana kwenye bajeti yetu. Tunapaswa kuongeza juhudi katika kipindi kilichobaki ili kufikia malengo haya. Kama mnavyojua, mapato ndiyo moyo wa Halmashauri yetu," alisema Mhe. Yagi.

Mhe. Yagi alitoa wito kwa wananchi kutunza chakula kutokana na mabadiliko ya hali ya hewa yanayoweza kuathiri akiba yao.

Alisema kuwa jua kali linaloendelea kushuhudiwa linaweza kuathiri mazao na hivyo, aliwataka wananchi kuwa waangalifu na kuhakikisha wanatunza chakula cha kutosha kwa matumizi ya baadaye.

"Hali ya hewa imebadilika na inatishia. Naomba wananchi wa Manispaa hii, hasa wale wenye akiba ya chakula, wawe waangalifu na wasiichezee chakula. Inapotokea hali ya jua kali, inaweza kuathiri akiba ya chakula waliyonayo.

"Ni vyema chakula hicho kiwekwe vizuri na kutunzwa ili kiweze kuwasaidia wakati wa uhaba," alisisitiza Mhe. Yagi.