MKUU WA MKOA WA SINGIDA ASIKILIZA KERO ZA WANANCHI WA MANISPAA YA SINGIDA

Posted on: January 17th, 2023

MKUU wa Mkoa wa Singida Peter Serukamba, ameagiza Wataalamu na Viongozi wa Manispaa ya Singida kuwa karibu zaidi na Wananchi wao, ili kusikiliza na kutatua kero mbalimbali zinazoikabili jamii ya Halmashauri hiyo.

Serukamba ametoa maagizo hayo, baada ya kusikiliza kero za Wananchi wa Manispaa ya Singida, kwenye kikao kilichofanyika katika ukumbi wa jengo la ofisi Mkuu wa Mkoa na kuzitafutia ufumbuzi wa kudumu.

Kwenye Kikao hicho, licha ya idadi kubwa ya Wananchi kujitokeza, pia Watendaji wa Kata, Wakuu wa divisheni na vitengo wa Manispaa ya Singida, walishiriki ili kujibu hoja za lazima, zilizowasilishwa na Wananchi.

“Utatuzi wa kero za Wananchi ni jambo linaloleta matumaini kwao pia ni  utekelezaji wa ilani ya CCM, tuendelee na utaratibu huu…kwa kweli ndiyo kazi yetu, tusisubiri hadi waje wakubwa, ndipo tutatue kero zao,” alisema Serukamba.

Alifafanua kuwa, baadhi ya kero zilizowasilishwa hazihitaji fedha wala nguvu kubwa kuweza kuzitatua, bali ni majibu mazuri, yenye kuakisi matumaini, katika kutafuta ufumbuzi wa changamoto hizo zinazoikabili jamii.

Baadhi ya kero zilizotawala katika kikao hicho ni malalamiko dhidi ya idara ya ardhi kero 15, madeni ya wazabuni, afya, TASAF na usafi na mazingira.

Kutokana na hali hiyo, Mkuu wa Mkoa, aliwataka Wataalamu, wakiwemo watendaji wa Kata na ofisi ya Mkurugenzi, kukutana na Wananchi mara kwa mara, badala ya kusubiri viongozi wakubwa wanapokuwa katika ziara zao.

Pamoja nayo Mkuu huyo wa mkoa amesisitiza suala la utoaji elimu kwa wananchi ikiwa ni moja ya mkakati wa kupunguza kero kwa wananchi  ambapo alisema, wananchi wakielimishwa vyema changamoto ama matatizo yao yatamalizwa katika ngazi ya Kata na Ofisi ya Mkurugenzi

Mkurugenzi wa Halmashauri ya Manispaa ya Singida, Jeshi Godfrey Lupembe, alibainisha kuwa, kupitia kikao hicho wataalamu wameweza kujifunza, kutokana na kero zilizowasilishwa na Wananchi.

“Matatizo haya tunayoyaona hapa, kama kungekuwa na vikao vya kisheria ngazi ya Kata, hapa leo mapungufu yasingejitokeza…sisi watumishi wako leo tumeona kwa vitendo unavyofundisha, tunakuahidi yote uliyoelekeza tutayafanyia kazi,” alisema Jeshi.

Mkuu wa mkoa wa Singida Peter Serukamba, amepanga ratiba ya kusikiliza kero kwa wananchi wa mkoa wake kila mwezi, akianza katika Manispaa ya Singida, kwa kufungua mlango huo.