MKUU WA WILAYA YA SINGIDA AONGOZA KIKAO CHA ELIMU KUHUSU MFUMO WA STAKABADHI GHALA

Posted on: August 14th, 2024

Mkuu wa Wilaya ya Singida, Mhe. Godwin Gondwe, ameongoza kikao kazi kilicholenga kutoa elimu juu ya mfumo wa Stakabadhi Ghalani ulioboreshwa.Kikao hicho kilifanyika leo katika ukumbi wa Chuo cha Maendeleo ya Wananchi (FDC) na kushirikisha Wakuu wa Idara na Vitengo, Maafisa Ugani, na Watendaji wa Kata kutoka Halmashauri ya Manispaa ya Singida na Wilaya ya Singida.

Katika kikao hicho, Mhe. Gondwe alitoa maelekezo kwa maafisa ushirika kuhakikisha kuwa wakulima wanapata fedha zao kwa wakati, minada inafanyika kwa wakati, na vyama vya ushirika vinatoa huduma bora kwa wakulima. Aliagiza kuwa wakulima walipwe ndani ya saa 48, wanunuzi wasajiliwe ipasavyo, orodha za maghala na waendesha maghala ziwe wazi, na vituo vya ukusanyaji viongezwe.

Afisa Ushirika wa Mkoa wa Singida, Joseph Dachi, alieleza kwa kina kuhusu mfumo wa Stakabadhi Ghalani na jinsi ulivyoimarishwa. Mhe. Gondwe alisisitiza kwamba Serikali ya Jamhuri ya Muungano wa Tanzania inathamini wakulima wake, na mafunzo haya ni sehemu ya juhudi za kuboresha hali ya maisha ya wakulima kwa kutoa msaada wa kitaalamu na kuhakikisha kuwa wanapata faida bora kutoka kwa mazao yao.

Mhe. Gondwe aliongeza kuwa mfumo huu utasaidia wakulima kuuza mazao yao kwa bei nzuri, tofauti na mfumo wa awali, na utakuwa rafiki kwa mkulima. Alisisitiza umuhimu wa elimu hii kwa watumishi ili waweze kutoa msaada bora kwa wakulima kuhusu mfumo huu mpya.

Afisa Ushirika, Dachi, alikiri kwamba mfumo huu utaongeza fursa kwa wakulima, utawasaidia kuuza mazao yao kwa bei nzuri, na kuboresha ufanisi katika sekta ya kilimo. Alifafanua kuwa mafunzo haya ni sehemu ya juhudi za serikali kuhakikisha wakulima wanapata huduma bora na faida kutokana na shughuli zao za kilimo, hasa kwa mazao ya dengu, mbaazi, na choroko katika Wilaya ya Singida.