SHULE YA MSINGI TUMAINI VIZIWI YACHAGUA NISHATI SAFI, YAOKOA GHARAMA NA KULINDA MAZINGIRA

Posted on: May 26th, 2025

Katika kuunga mkono juhudi za Serikali ya Awamu ya Sita katika kulinda mazingira kwa kutumia nishati safi, Shule ya Msingi Tumaini Viziwi iliyopo Manispaa ya Singida, imeachana rasmi na matumizi ya kuni na sasa inatumia gesi kwa ajili ya kupikia chakula cha wanafunzi wake.

Hatua hiyo imekuja wakati Serikali ikiendelea kusisitiza umuhimu wa matumizi ya nishati mbadala ili kupunguza uharibifu wa mazingira unaotokana na ukataji miti kwa ajili ya kuni na mkaa, huku ikiweka mkazo kwenye matumizi ya gesi, umeme na teknolojia nyingine rafiki kwa mazingira.

Mkuu wa shule hiyo, Mwalimu Francis Edward, alisema uamuzi wa kuhamia kwenye matumizi ya gesi umekuwa na manufaa makubwa si tu kwa mazingira, bali pia kwa upande wa gharama.

"Tulikuwa tunatumia kiasi kikubwa cha fedha kununua kuni kila mwezi. Lakini tangu tuanze kutumia gesi, tumepunguza matumizi hayo kwa kiasi kikubwa. Pia mazingira ya shule yamekuwa safi zaidi na afya za wapishi wetu zimeimarika kwa sababu hawakabiliwi tena na moshi mzito," alisema Mwalimu Francis.

Aliongeza kuwa, hatua hiyo si tu kwamba imepunguza gharama za uendeshaji wa shule bali pia imewawezesha wanafunzi kupata chakula kwa wakati, kwani gesi ni ya haraka na rahisi kutumia ukilinganisha na kuni.