Viongozi wa Mkoa wa Singida Watembelea Mabanda ya Maonesho ya Nane Nane Dodoma

Posted on: August 4th, 2024

Viongozi wa Mkoa wa Singida Watembelea Mabanda ya Maonesho ya Nane Nane Dodoma

Viongozi wakuu wa Mkoa wa Singida wakiongozwa na Mkuu wa Mkoa, Halima Dendego, na Katibu Tawala wa Mkoa, Dkt. Fatuma Mganga, leo wamefanya ziara ya kutembelea mabanda mbalimbali katika Maonesho ya Kimataifa ya Nane Nane yanayoendelea katika Viwanja vya Nzuguni, Dodoma. Ziara hii inafanyika siku ya nne tangu maonesho hayo yazinduliwe rasmi na Waziri Mkuu, Kassim Majaliwa.

Wakiwa katika mabanda hayo, viongozi hao walijionea shughuli mbalimbali za kilimo, ufugaji, na teknolojia zinazotolewa na wakulima, wafugaji, na wajasiriamali kutoka mikoa tofauti. Maonesho haya, ambayo hufanyika kila mwaka, yanatoa fursa kwa washiriki kuonyesha bidhaa na huduma zao, na pia kujifunza teknolojia mpya za kilimo ambazo zinatarajiwa kuongeza tija katika sekta ya kilimo nchini.

Mkuu wa Mkoa, Halima Dendego, alieleza kuridhishwa na maandalizi ya mwaka huu na kusisitiza umuhimu wa maonesho haya katika kuchochea maendeleo ya kilimo na ufugaji. “Maonesho ya Nane Nane ni jukwaa muhimu kwa wakulima wetu kujifunza mbinu za kisasa za uzalishaji, na pia kuwapa fursa ya kuonyesha bidhaa zao. Tunawapongeza wote waliojitokeza na tunawahimiza wananchi kushiriki kwa wingi ili kufaidika na elimu inayotolewa hapa,” alisema Dendego.

Kwa upande wake, Katibu Tawala wa Mkoa, Dkt. Fatuma Mganga, aliongeza kuwa ushiriki wa mkoa wa Singida katika maonesho haya ni muhimu sana, kwani unatoa nafasi ya kuimarisha sekta ya kilimo ambayo ni uti wa mgongo wa uchumi wa mkoa huo.

Maonesho ya Nane Nane, ambayo mwaka huu yanafanyika chini ya kaulimbiu ya “Chagua viongozi bora wa Serikali za Mitaa kwa maendeleo endelevu ya Mifugo na Uvuvi "