.KAMATI YA FEDHA NA UTAWALA YA MANISPAA YA SINGIDA YAKAGUA MIRADI YA MAENDELEO

Posted on: November 7th, 2024

Kamati ya Fedha na Utawala ya Halmashauri ya Manispaa ya Singida leo, Novemba 7, 2024 imekagua miradi mbalimbali ya maendeleo na kutoa maelekezo kwa Menejimenti ya Halmashauri kuhakikisha miradi hiyo inakamilika kwa ubora na viwango vya juu.

Kamati hiyo, inayoongozwa na Mwenyekiti wake, Mstahiki Meya wa Manispaa ya Singida, Mhe. Yagi Kiaratu, ilifanya ziara ya ukaguzi wa miradi hiyo na kutoa msisitizo kuhusu umuhimu wa utekelezaji wa miradi kwa ufanisi na kwa wakati.

Meya Kiaratu alisisitiza kwamba miradi hiyo lazima ikamilike kwa ubora wa juu ili kuhakikisha wananchi wanapata huduma bora.

Miradi iliyokaguliwa na Kamati ya Fedha na Utawala ni pamoja na ujenzi wa madarasa sita na matundu nane ya vyoo katika Shule ya Sekondari ya Mandewa, ambayo imekamilika. Kamati pia ilitembelea na kukagua ujenzi wa Shule ya mpya Sekondari ya Mwaja, inayojengwa katika Kata ya Mandewa, ilikagua miundombinu ya kidato cha tano na sita katika Sekondari ya Mufumbu ikiwa katika hatua ya umaliziaji kwa upande wa madarasa na mabweni yakiwa katika hatua za awali.

Pia, Kamati ilikagua ujenzi wa vyumba vinne vya madarasa na matundu sita ya vyoo katika Shule ya Sekondari ya Kindai, ambapo ujenzi huo umekamilika. Ujenzi wa madarasa matatu na matundu sita ya vyoo unaendelea katika Shule ya Msingi ya Kimpungua, huku Kamati ikiangalia pia eneo lililotengwa kwa ajili ya ujenzi wa Shule ya Sekondari ya Minga, inayotarajiwa kujengwa katika Kata ya Unyambwa.

Akizungumza baada ya ukaguzi, Meya Kiaratu alisisitiza kwamba Serikali inatoa fedha nyingi kwa ajili ya kuboresha miundombinu ya elimu, na hivyo, ni muhimu kwa miradi hii kusimamiwa na kujengwa kwa ubora wa juu ili wananchi wapate huduma bora. Alisema,

"Tuna jukumu la kuhakikisha miradi yote inaendelea vizuri na kwa kiwango cha juu, ili kumaliza changamoto za huduma bora za elimu katika Manispaa yetu."