KATIBU NEC, CCM AUPONGEZA MKOA WA SINGIDA KWA USIMAMIZI BORA WA UJENZI WA SOKO LA VITUNGUU

Posted on: January 19th, 2026

Katibu wa NEC, Itikadi, Uenezi na Mafunzo wa Chama Cha Mapinduzi (CCM), Kenan Kihongosi, amepongeza uongozi wa Mkoa wa Singida kwa usimamizi mzuri wa ujenzi wa Soko la Kimataifa la Vitunguu, mradi mkubwa wa kimkakati unaotarajiwa kuleta mageuzi ya kiuchumi katika mkoa huo.

Kihongosi ametoa pongezi hizo, leo Januari 19, 2025 alipotembelea na kukagua maendeleo ya ujenzi wa soko hilo linalogharimu Sh bilioni 3.9, unaotekelezwa chini ya mradi wa TACTIC na kusimamiwa na Halmashauri ya Manispaa ya Singida chini ya Mkurugenzi wake, Bi Joanfaith Kataraia.

Amesema mradi huo ni matokeo ya dhamira ya Serikali ya Awamu ya Sita chini ya Rais Samia Suluhu Hassan, akieleza kuwa wazo la ujenzi wa soko hilo lilianza kujadiliwa zaidi ya miaka sita iliyopita, lakini utekelezaji wake umeanza rasmi katika kipindi cha uongozi wa Rais Samia.

“Kwanza nianze kwa kumpongeza Rais wetu, Dkt Samia Suluhu Hassan. Mradi huu ulianza kuzungumzwa miaka sita iliyopita, lakini ni katika uongozi wake ndipo fedha zimeanza kutolewa na utekelezaji kuanza,” amesema Kihongosi.

Aidha, ameupongeza uongozi wa Mkoa wa Singida wakiongozwa na Mkuu wa Mkoa, Mhe. Halima Dendego, pamoja na Mkuu wa Wilaya, Godwin Gondwe, Mkurugenzi wa Manispaa na wataalamu wake kwa usimamizi mzuri wa mradi huo.

“Niwapongeze kwa dhati kwa kazi nzuri. Chama kinaridhishwa na kasi na ubora wa utekelezaji wa mradi huu. Tunachokisisitiza ni kazi ifanyike kwa viwango, kwa ubora unaotakiwa na ikamilike kwa wakati bila kuongeza muda,” amesema.

Kihongosi amesema kukamilika kwa soko hilo kutaufanya Mkoa wa Singida kuwa kitovu muhimu cha biashara ya vitunguu nchini na ukanda wa kati, sambamba na kutoa fursa za ajira kwa wananchi na kuchochea ukuaji wa uchumi wa Manispaa ya Singida na wilaya jirani.

Ameeleza kuwa soko hilo la kisasa litabadilisha taswira ya Manispaa ya Singida na kuwa mfano wa kuigwa katika utekelezaji wa miradi mikubwa ya kimkakati nchini.