KAMATI YA ULINZI NA USALAMA YA MKOA WA SINGIDA YATEMBELEA MIRADI - UVIKO-19

Posted on: November 23rd, 2021

Mkuu wa Mkoa wa Singida Dr. Binirith Mahenge pamoja na wajumbe wa Kamati ya Ulinzi na Usalama ya Mkoa leo Novemba 23, 2021 wametembelea miradi 6 kati ya miradi 15 ya ujenzi wa vyumba vya  madarasa vya shule za sekondari kupitia fedha za Mpango wa maendeleo kwa ustawi wa Taifa na mapambano dhidi ya UVIKO – 19 .

Dr. Mahenge amepongeza jitihada za ujenzi na usimamizi zinazofanywa na kamati za ujenzi katika baadhi ya shule na kuutaka ungozi wa shule zenye miradi kuongeza kasi kwa kusimamia mafundi kwa ukaribu  zaidi.

Hata hivyo Mkuu wa Mkoa amekemea shule ambazo zimeonekana kuwa na kasi ndogo katika ujenzi na kuzipa siku 7 ili kufikia hatua ya lenta.

“Ninatoa siku 7 kwa shule ambazo ziko nyuma katika ujenzi kuhakikisha wanafikia hatua ya lenta. “alisema.

Dr. Mahenge amemtaka Mkurugenzi wa Manispaa pamoja na wataalam wake kuhakikisha wanasimamia kwa karibu ujenzi wa vyumba vya madarasa kwa kuunda timu itakayowahusisha Wakuu wa Idara wote ili kufanya shughuli ya usimamizi na ufuatiliaji kuwa rahisi.

Halmashauri ya Manispaa ya Singida ilipokea kiasi cha fedha Tshs. 840,000,000/- zinazotokana na Mpango wa Maendeleo kwa ustawi wa Taifa na Mapambano dhidi ya UVIKO – 19 ambazo zitatumika katika ujenzi wa vyumba vya madarasa 34 vya  shule za sekondari na vyumba 08 vya madarasa katika shule shikizi 04.

Mkuu wa Mkoa Dr. Mahenge pamoja na wajumbe wa kamati ya Ulinzi na Usalama Mkoa wakipokea taarifa ya ujenzi wa vyumba 03 vya madarasa kutoka kwa Mkuu wa  shule ya sekondari Unyamikumbi