RC: SINGIDA AAGIZA TAKUKURU KUSHIRIKIANA NA VYAMA VYA WAFANYAKAZI KUONDOA RUSHWA ZA AINA ZOTE KATIKA HALMASHAURI NA TAASISI ZA UMMA

Posted on: May 1st, 2022

Mkuu wa Mkoa wa Singida Dr. Binirith Mahenge ameiagiza Taasisi ya kuzuia na kupambana na rushwa (TAKUKURU) kushirikiana na vyama vya wafanyakazi kuhakikisha rushwa za aina zote zinakomeshwa katika Halmashauri na Taasisi mbalimbali za Umma.

Dr. Mahenge ameyasema hayo katika maadhimisho ya Sherehe ya siku ya wafanyakazi duniani (Mei Mosi) zilizoadhimishwa kimkoa katika uwanja wa Namfua Mkoani Singida.

Alisema amefarijika kusikia katika risala iliyosomwa na Mratibu wa TUCTA mkoa kuwa rushwa ya ngono imepungua kwa kiasi kikubwa katika Taasisi za umma hivyo kutoa agizo kwa TAKUKURU kushirikiana na vyama vya wafanyakazi kuondoa rushwa zote makazini.

Aidha amesema waajiri na waajiriwa kwa Pamoja wanapaswa kuzingatia sheria Na. 6 ya mwaka 2004 ili kuhakikisha uadilifu na haki vinazingatiwa katika utoaji huduma katika taasisi zote.

Kuhusu suala la waajiri kuchelewesha michango ya Watumishi katika mifuko ya hifadhi ya ya Jamii, Mkuu wa Mkoa ambaye alikuwa Mgeni rasmi katika maadhimisho ya siku ya wafanyakazi ,ameiagiza TUCTA kuwasilisha kwake orodha ya waajiri wanaochelewesha michango ya waajiriwa sambamba na madai ya waajiriwa ili aweze kushughulikia nao.

Amewaasa Watumishi kujenga utamaduni wa kutembelea mifuko ya hifadhi ili kujua taarifa za michango yao badala ya kusubiri muda wa kustaafu unapofika ili kuepuka usumbufu.

Pamoja na masuala mengine ya Maendeleo Dr. Mahenge ameipongeza Serikali ya awamu ya sita kwa miradi ya Maendeleo katika nyanja za elimu, afya, barabara na TASAF ambapo kwa mkoa waSingida kiasi cha takribani Tshs. Bilioni 232 zimepokelewa kwa ajili ya miradi ya Maendeleo

Naye Katibu Tawala Mkoa wa Singida Bi. Doroth Mwaluko amewapongeza watumishi kwa kutekeleza majukumu yao vizuri na kuwataka kufuata taratibu za kiutumishi kwa umakini zaidi ili kuhakikisha shughuli za maendeleo na huduma kwa wananchi hazikwami.

“nimeona mnacheza vizuri mziki wa kwaito kwa kufuata step barabara, vivyo hivyo mfuate step za kiutumishi katika utekelezaji wa majumu yenu” alisisitiza Bi. Mwaluko.

Mratibu wa wa TUCTA Bi. Susan Shashi kupitia risala amepongeza watumishi wote kwa utekelezaji mzuri wa majukumu na hasa Wakurugenzi waliotoa kipaumbele kwa mabaraza ya wafanyakazi kufanyika katika kipindi cha bajeti na tahmini ya utekelezaji wa shughuli za Maendeleo kwani yameleta ufanisi mkubwa katika utekelezaji shughuli za Maendeleo.

Aidha Bi Suzan amewataka Wakurugenzi kuhakikisha wanalipa kwa wakati fedha za uhamisho wa watumishi pindi unapofanyika ili kuepuka kuleta usumbufu kwa mtumishi/Watumishi waliohamishwa. Pamoja na malipo ya uhamisho ametaja masuala mengine ambayo yanaleta usumbufu kwa Watumishi kuwa ni Pamoja na madai mbalimbali ya shahiki zao na adhabu zinazotolewa kwa Watumishi bila sababu za msingi.

Akizungumza kwa niaba ya viongozi wa dini mbalimbali katika mkoa wa Singida Mwenyekiti wa Dini Mbalimbali ambaye pia ni Diwani wa kata ya Misuna Mhe. Hamis Momahed Kisuke amewataka watumishi kuwa waadilifu katika utekelezaji wa majukumu yao kwa kuepuka dhuluma ili haki itendeke na amani itawale.

“Ndugu zangu watumishi jitahidini kuepuka dhuluma ili haki itendeke kwani bila haki amani inatoweka na hivyo migogoro kuibuka”, aliasa Mhe. Kisuke

Watumishi wa Idara ya Afya katika Manispaa ya Singida wakipita kwa madaha mbele ya mgeni rasmi Mkuu wa Mkoa wa Singida Dr. Binirith Mahenge katika maadhimisho ya siku ya wafanyakazi duniani

Kaimu Mkurugenzi wa Manispaa ya Singida Ndg. Kulaga Kanyanga ( Mwenye Miwani) akisikiliza kwa makini risala iliyosomwa na Mratibu wa TUCTA mkoa wa Singida