MAKABIDHIANO YA OFISI YA MKURUGENZI WA MANISPAA SINGIDA YAFANYIKA

Posted on: February 11th, 2022

Mstahiki Meya wa Manispaa ya Singida Mhe. Yagi Kiaratu  amemwelezea Mkurugenzi aliyemaliza muda Ndg. Zefrin Lubuva kuwa ni mchapa kazi kwani kwa kipindi kifupi ameweza kuifanya Manispaa Singida ikaonekana kwa mabadiliko chanya aliyoyafanya hasa katika suala zima la ukusanyaji mapato Kutoka nafasi za mwisho hata kufikia nafasi ya nne (4) katika Manispaa 20 kwa kusimamia vyema vyanzo vya mapato.

Mhe. Yagi aliyasema hayo katika hafla fupi ya makabidhiano ya Ofisi baina ya Mkurugenzi aliyemaliza muda na Kaimu Mkurugenzi wa Manispaa hiyo ambayo pia yalishuhudiwa na Wakuu wa Idara na Vitengo pamoja na wawakilishi kutoka Ofisi ya Mkuu wa Mkoa na Ofisi ya Mkuu wa Wilaya Singida

“Lubuva alisimamia vyanzo 5 kwa umakini vikatufanya Manispaa ya singida tuonekane”, alisisitiza mstahiki meya na kuongeza kuwa ni wakati sasa wa kujipanga vyema ili kukusanya zaidi kupitia vyanzo vyote vya mapato.

Mhe. Yagi amemwagiza Kaimu Mkurugenzi kuhakikisha kila mkuu wa Idara anakuwa na chanzo cha mapato cha kusimamia ili pindi panapotokea ulegevu ajulikane wa kumwajibisha. Pamoja na hayo Mstahiki Meya amehimiza nidhamu kwa watumishi na kusisitiza kuwa nidhamu ni msingi utakaoipeleka Manispaa ya Singida kufikia Maendeleo.

Akitoa neno la shukrani kabla ya makabidhiano, Ndg. Zefrin Lubuva aliwataka Wakuu wa Idara ambao walikuwepo kushuhudia makabidhaino hayo kuwa wabunifu katika kutekeleza majukumu yao hasa suala la ukusanyaji mapato ili kusukuma mbele gurudumu la Maendeleo.

Lubuva alipongeza Baraza la madiwani kwa kuwa makini katika kusimamia utekelezaji wa miradi na ukusanyaji wa mapato na kusema ni Baraza lenye umakini linalosimamia haki na kutoa rai kwa Kaimu Mkurugenzi Ndg. Jeshi Lupembe kushirikiana vyema na madiwani ili kufikia malengo kusudiwa.

Naye Kaimu Mkurugenzi wa Manispaa ya Singida alimpongeza Mkurugenzi huyo aliyemaliza muda kwa mabadiliko chanya aliyoyafanya katika kipindi cha miezi sita aliyotumikia Manispaa ya Singida.

“Napongeza juhudi kubwa alizofanya ndugu yangu Lubuva katika kipindi kifupi ambazo zimeonesha matokeo chanya” alisema Lupembe.

Aidha amewataka Wakuu wa Idara na Vitengo kubadilika na kufanya kazi kwa malengo ili kuitendea haki Singida. “Sote tumeletwa hapa Manispaa ili kuitendea haki Singida kwa kufanya kazi kwa malengo ili tupate matokeo chanya” Alisisitiza Kaimu Mkurugenzi.

Mwakilishi kutoka Ofisi ya RAS, Bi Masemba Kazeni alimshukuru Ngd. Lubuva kwa kazi nzuri alizofanya kwa kipindi alichokuwepo katika uongozi wake na kumtaka Kaimu Mkurugenzi wa Manispaa kusimamia vyema utekelezaji wa majukumu mbalimbali ya Manispaa kwani kwa kufanya hivyo atakuwa ameitendea haki nafasi ama dhamana aliyopewa.

Aidha aliwaasa Wakuu wa Idara kutoa ushirikiano kwa Kaimu Mkurugenzi ili kufanikisha azma ya kuiletea Maendeleo Manispaa ya Singida.

Mkurugenzi aliemaliza muda Ndg. Zefrin Lubuva (Kulia) akikabidhi kitabu cha taarifa ya makabidhiano kwa Kaimu Mkurugenzi wa Manispaa ya Singida Ndg. Jeshi Lupembe ( kushoto) huku wakishuhudiwa na Mstahiki Meya wa Manispaa Mhe. Yagi Kiaratu, Mwakilishi wa RAS, Bi. Masemba Kazeni , Kaimu DAS Ndg. Alli Mwendo na wakuu wa Idara na vitengo  ( hawapo pichani)