MANISPAA YA SINGIDA YANG’AA MASHINDANO YA WANASAYANSI CHIPUKIZI

Posted on: May 9th, 2025

Manispaa ya Singida imetoa tuzo kwa wanafunzi wanne walioshiriki mashindano ya kitaaluma ya wanasayansi chipukizi (Young Scientists) mwaka 2024, ambao wameiwezesha Manispaa ya Singida kushika nafasi ya pili kitaifa kutokana na maandiko (projects) ambayo waliwasilisha.

Tuzo hizo na vyeti vimetolewa leo, Mei, 9 2025 katika Mkutano wa pili wa Baraza la Madiwani la robo ya tatu lililofanyika katika Ukumbi wa chuo cha Ufundi - VETA ambapo wanafunzi hao walitoa wasilisho la andiko lao kwa ufupi lililohusu ‘Tanzania and the World Economy’ mbele ya wajumbe wa baraza, wataalam, kamati ya usalama wilaya na wageni waalikwa katika mkutano huo.

Akikabidhi tuzo hizo Mstahiki Meya wa Manispaa ya Singida, Mhe. Yagi Maulid Kiaratu amesema wanafunzi hao, Winfrida Vicent Haliyake ( Mitunduruni), Ally Abdallah Almas( Mitunduruni), Maureen Adrian Macha (Dr. Salmin Amour) na Humphrey Lwimiko Mwambene ( Dr. Salmin Amour) wameiheshimisha Manispaa ya Singida na kutoa agizo la kuhakikisha shule zote za sekondari zinashiriki mashindano hayo.

“Watoto hao wametuheshimisha sana… afisa elimu hakikisha shule zote za sekondari zinashiriki tuweze kuibua vipaji vilivyojificha, hongereni sana “, amesisitiza Mhe. Kiaratu

Aidha Mhe. Kiaratu amewapongeza walimu waliowaandaa wanafunzi hao ambao ni Mwl. Emmanuel Makala (Mitunduruni ) na Mwl. Juma Thomas ( Dr. Salmin Amour) na kuwataka kujituma zaidi ili kuibua wanafunzi wengi wenye vipaji tofauti.

Jumla ya maandiko ya ubunifu 1042 yaliwasilishwa na shule mbalimbali nchini, 281 yalivuka hatua za awali ambapo mkoa wa Singida ulikuwa na jumla ya bunifu 10 zilizofanikiwa kuingia hatua ya pili ya mashindano.

Aidha katika hatua ya tatu jumla ya bunifu 44 zilipita, Mkoa wa Singida ukiwa na bunifu tatu bora kutoka shule ya za sekondari za Mitunduruni, Dr. Salmin Amour ( zote za Manispaa ya Singida) na Lulumba ya Iramba.