UKATILI NI CHANZO CHA UMASIKINI

Posted on: November 20th, 2025

Katika jitihada za kuhakikisha ustawi na usalama wa jamii unaimarika, Afisa Maendeleo ya Jamii wa Kata ya Ipembe, Yonathan Steven Mpoto, ametoa elimu kuhusu madhara ya ukatili katika jamii, hususan athari za kisaikolojia na kijamii zinazoweza kuchangia kuongezeka kwa umasikini.

Elimu hiyo imetolewa kwa wananchi wa kata hiyo katika mkutano uliofanyika Shule ya Msingi Ipembe, ambapo Bw. Mpoto alisisitiza umuhimu wa jamii kutambua madhara ya ukatili na kuchukua hatua za mapema kukomesha vitendo hivyo.

Afisa huyo alisema bado kuna baadhi ya mila na desturi zinazochochea unyanyasaji, jambo ambalo linaendelea kuirudisha nyuma jamii katika maendeleo.

“Ni lazima kama jamii tuachane na mambo ya ukatili ili kuwa na jamii salama kuanzia watoto mpaka watu wazima. Jamii isiyokuwa na ukatili ndiyo inaweza kujenga msingi imara wa maendeleo bila kuendekeza desturi zinazodhalilisha,” alisema Bw. Mpoto.

Wananchi waliohudhuria kikao hicho walipongezwa kwa kujitokeza kupata elimu na kuhamasishwa kuwa mabalozi wa kupinga ukatili katika maeneo yao ili kutengeneza mazingira bora ya malezi na ustawi wa jamii ya Ipembe na taifa kwa ujumla.