WALIMU 248 WAPATIWA MAFUNZO YA MFUMO WA SIS

Posted on: January 9th, 2026

KAIMU Mkurugenzi wa Manispaa ya Singida ambaye pia ni Afisa Elimu Sekondari, Mwalimu Hemed Athuman Mnyusi, amefungua mafunzo ya siku mbili ya matumizi ya mfumo wa School Information System (SIS) kwa shule za Sekondari na Msingi zipatazo 248 za serikali na binafsi.

Mafunzo hayo yameanza leo Januari 9, 2026 katika ukumbi wa Shule ya Sekondari Mwenge, Manispaa ya Singida, yakihusisha Wakuu wa Shule, Walimu Wakuu pamoja na wataalamu wa mifumo ya TEHAMA kutoka mashuleni.

Mpango wa matumizi ya mfumo wa SIS unasimamiwa na Ofisi ya Waziri wa Nchi, Tawala za Mikoa na Serikali za Mitaa (TAMISEMI), ukiwa na lengo la kuboresha usimamizi na uendeshaji wa shughuli za elimu nchini.

Mpango huo ulianza kutekelezwa rasmi mwaka 2023, ambapo walimu na watendaji mbalimbali wa elimu walipatiwa mafunzo ya awali ili kuwaandaa kwa matumizi ya mfumo huo wa kidijitali.

Kupitia mfumo wa SIS, shule zinatarajiwa kufanya kazi kwa ufanisi zaidi, kupunguza matumizi ya karatasi pamoja na kuboresha upatikanaji wa taarifa kwa haraka na kwa wakati, ikilinganishwa na mifumo ya awali ya uendeshaji wa shughuli za shule.