WALIMU 55 WA MANISPAA YA SINGIDA WAPATIWA MAFUNZO JUU YA MTAALA MPYA ULIOBORESHWA 2023.

Posted on: February 12th, 2024

Walimu wa Darasa la Kwanza 55 katika Halmashauri ya Manispaa ya Singida, leo Februari 12, 2024 wameanza mafunzo kwa ajili ya Mtaala mpya ulioboreshwa 2023, huku matarajio ni kuona mabadiliko kitaaluma baada ya mafunzo hayo.

Mafunzo hayo yamefunguliwa rasmi leo na Mkuu wa Divisheni ya Elimu ya Awali na Msingi wa Manispaa ya Singida, Omary Maje, katika Ukumbi wa kituo cha walimu(TRC) cha Nyerere, mafunzo ambayo yatakayofanyika kwa siku tano kituoni hapo.

Akifungua mafunzo hayo, Maje amesema anatarajia kuona mabadiliko makubwa katika ufundishaji kwa walimu na ujifunzaji kwa wanafunzi wa darasa la kwanza katika shule hizo mara baada ya mafunzo hayo ya siku tano kukamilika.

“Natarajia kuona mabadiliko makubwa hasa baada ya mafunzo haya pale mtakaporejea mashuleni. Jambo la msingi napenda kuona katika mafunzo haya mnafuatilia hatua kwa hatua na kuhakikisha mmelewa,” amesisitiza Maje.

Lengo la mafunzo hayo ni kuwawezesha walimu katika ufundishaji na ujifunzaji wa Lugha ya Kiingereza (English Language) na KKK (kusoma, kuandika na kuhesabu) kwa darasa la kwanza kulingana na Mtaala ulioboreshwa 2023.

Mkoa wa Singida ni miongoni mwa mikoa 9 inayoendesha programu ya Shule Bora, kutokana na mikoa hiyo kutofanya vizuri kitaaluma.

Mafunzo hayo yameandaliwa na Wizara ya Elimu, Sayansi na Teknolojia kupitia Taasisi ya Elimu Tanzania kwa kushirikiana na Ofisi ya Rais Tawala za Mikoa na Serikali za Mitaa (TAMISEMI) lengo likiwa ni kufanya thamini ya ufundishaji na ujifunzaji kulingana na mtaala ulioboreshwa 2023.

Jumla ya shule 55 ikiwa ni mwalimu mmoja kutoka katika kila shule zinapatiwa mafunzo hayo kwa muda wa siku 5.