WATENDAJI SINGIDA WATAKIWA KUELIMISHA WAKULIMA JUU YA UBORA WA MBEGU YA RUZUKU YA ALIZETI AINA YA RECORD

Posted on: January 5th, 2024

Watendaji Singida wametakiwa kuitisha mikutano ya hadhara Ili kutoa elimu Kwa wananchi juu ya matumizi bora ya mbegu ya bora za ruzuku aina ya record Ili waweze kuzitumia katika msimu huu wa kilimo.

Kaimu Mkuu wa Wilaya ya Singida, Moses Machali ametoa maagizo kwa Watendaji Vijiji na Mitaa wa wilaya ya Singida yenye halmashauri mbili za Manispaa ya Singida na Halmashauri ya Wilaya ya Singida na kuwataka wakulima katika halmashauri hizo kujiandikisha katika daftari kupitia watendaji wa vijiji vyao.

Machali amesema hayo katika Kikao kazi maalum kilichofanyika leo Januari 5, 2024, katika Ukumbi wa shule ya sekondari Mwenge ambapo alisisitiza pia mbegu hizo zitauzwa kwa fedha taslim na sio mkopo.

Kikao kazi hicho kiliwahusisha Madiwani wa halmashauri hizo mbili, Maafisa Tarafa, Maafisa Ugani, Watendaji wa Kata na Vijiji.

Machali amesema Watendaji hao wanatakiwa kuwaelimisha wananchi na kuwaeleza ubora wa mbegu za record kwa kilimo chenye tija.

Katika kuhakikisha mbegu zinawakifikia wakulima kiongozi huyo amesema, kwenye mikutano hiyo itakayofanyika katika vijiji na mitaa, Watendaji wafikishe ujumbe kwa wananchi jinsi gani serikali ya awamu ya sita inavyowathamini wakulima Kwa kuwaletea mbegu za ruzuku.

Aidha amewataka watendaji hao kupitia mikutano hiyo, kuwaorodhesha wakulima watakaotumia mbegu za ruzuku za record na kiasi cha tani za mbegu kitakachitumika.

Machali amesema mkoa wa singida umepatiwa zaidi ya Tani 700 na kwamba endapo patatokea upungufu mawasiliano ya haraka yafanyike Ili kupata nyongeza ya mbegu kutoka kwa Wakala wa Kilimo (ASA).

Mkuu huyo wa wilaya ameagiza kupatiwa taarifa ya wakulima waliojiorodhesha ifikapo Januari 9, 2024 Ili kuweza kupata takwimu ya kiasi cha tani za mbegu zitakazoagizwa.

Hata hivyo, Machali alisisitiza kuwa :"Mbegu hizi zinauzwa (Mbegu za Alizeti Record) na hazikopeshwi na zitauzwa katika maeneo husika kama ilivyokuwa mwaka jana".