WATUMISHI WA AJIRA MPYA WAASWA KUTOA HUDUMA BORA NA STAHIKI KWA WANANCHI

Posted on: March 18th, 2025

Watumishi wa ajira mpya wa kada mbalimbali katika Manispaa ya Singida wameaswa kutoa huduma bora na stahiki kwa wananchi ili kutimiza lengo la serikali la kuhakikisha wananchi wake wanafikiwa na kupatiwa huduma bora.

Wito huo umetolewa leo Machi 18, 2025 na Mstahiki Meya wa Manispaa ya Singida, Yagi Maulid Kiaratu, wakati akifungua semina ya siku moja kwa waajiriwa wapya wa kada mbalimbali katika Manispaa ya Singida, semina iliyofanyika katika Ukumbi wa Maktaba Shule ya Sekondari Mwenge.

Kiaratu amewataka kila mmoja kwenda kutekeleza wajibu wake katika eneo lake la kazi kama ambavyo serikali ilivyo mwamini na kumpatia nafasi hiyo baada ya kupitia mchakato mrefu wa kuwatathmini na hatimaye kuaminiwa nakupewa nafasi walizo nazo sasa.

“ kama wewe ni mhudumu wa afya katimize wajibu wako katika kile ulichoaminiwa nacho…. Watendaji wa kata na mitaa ninyi ndiyo mna watu mkatoe huduma kusudiwa kwa wananchi ambayo serikali inatarajia kutoka kwenu…. Maafisa maendeleo ya jamii tunawategemea sana, ninyi ndiyo wahamasishaji, wasimamizi na watu mnaoshughulika na jamii kwa sehemu kubwa, mkawajibike……” amesisitiza Kiaratu.

Akifafanua juu ya mada zitakazo tolewa Mkuu wa Divisheni ya Utawala na Rasilimali watu , Edward Mboya amesema, watumishi hao ambao idadi yao ni Zaidi ya watu 95 wa kata za Utawala, Maendeleo ya Jamii na Afya watapatapatiwa elimu juu ya Ajira, stahiki na maslahi yao, lakini pia maadili ya watumishi wa umma na kupitishwa katika mwongozo wa mavazi wa watumishi wa umma.

Mboya amefafanua kuwa watumishi hao , vile vile watapata elimu juu ya umuhimu wa kujiunga na vyama vya wafanyakazi vinavyotetea maslahi ya watumishi kwa ujumla.

Katika kipindi cha miaka 4 Manispaa ya Singida imepokea jumla ya watumishi wa ajira mpya 238 wakiwemo watumishi wa kada za afya, elimu, madereva, watunza kumbukumbu, uhandisi, maendeleo ya jamii , mawasiliano ya umma na Utawala ambao ni watendaji wa kata na mitaa.